Vaiqhaemh roek diemj cung, ronghndwen lumj dahniq launyaenq he, ngaizngaiz nyednyed benz hwnj gyangmbwn, ndoj youq geh mbawfaex, lauyup hai aenda hung gyaeundei moengzloengz de, roxnyinh geizheih yawj aen daihdeih gvangqlangh fouz bien neix.

Mwh daengz caet diemj cungj, geubuh gwnzmbwn rox bienq saek de, ciemhciemh daj lamzdamh bienqbaenz lamzlaeg. Ronghndwen lumjbaenz mbeihung di lo, naengh hwnj byaifaex bae, roxsoq ngaek gyaeuj coh daihdeih. Hoeng mwh de naengh hwnj gwnz byaifaex, hix swnhbienh goemq hwnj caengz baengzsa mbang he, aen ronghndwen yienzbonj ronghcingx haenx, seizneix miz cungj moengzloengz gyaeundei he, sawj vunz simmaez dangqmaz.

Gyanghaemh bet diemj cung, ronghndwen moengzloengz dauqdaej nyaenx mbouj youq gij singq de, loh’ok gij singq cabheiq daeuj lo. Ronghndwen hainduj caeuq raeuz guhcaemz “doxndoj”: Cij raen de yaep ndeu ndoj haeuj ndaw geh fwj bae, yaep ndeu youh ndonj okdaeuj ndoj daengz byaifaex bae, guhcaemz ndaej angqvauvau. Ronghndwen seizneix, couh lumj duzcinglingz cabheiq ndeu, gizgiz cungj yienh’ok gij yiengh cabheiq de, sawj vunz ndiep- gyaez.

Seizgan daeujdaengz gouj diemj cung. Ronghndwen dwggyaez lumjbaenz siengj hwnj gij muzdiz de daeuj gizneix, couh fat ok gij rongh daegbied rongh de. Ronghndwen seizneix mbouj doengz bingzseiz, seizneix de lumj aen buenzngaenz ronghsagsag nei, sawj vunz doeksaet danqhaenh. Gij rongh de, lumj gaiqfwngz raeujrub daxmeh, lumh aenndang gou deng rumz gyanghaemh ci dwk miz di saenz haenx, sawj gou daengx ndang raeujrubrub. Gij rongh ronghcingx de, geijlai sawj vunz gingqcungh ha！

Couh youq mwh gou maez aen ronghndwen, cungj heiq homfwd he daj baihlaeng gou cienz gvaqdaeuj. Gou vaiqvet baenq ndang gvaqdaeuj, swnh gij heiqhom ra bae. Gou sawqmwh yawjraen ndaw fwngz daxmeh gaem miz doxgaiq lumj aen buenzhenj he, “bingjronghndwen!” Gou doeksaet geizheih hemq dwk. Gokbak myaiz cungj rih roengzdaeuj lo, gou vaiqvet ciep gvaq bingj- ronghndwen, haeb gwn gaemz ndeu, ha, caen ndei gwn ha! Gou ngiengx gyaeuj yawj aenronghndwen, gou fwt gyaengj youq lo, ronghndwen seizneix bienqndaej engqgya rongh lo, lumj dahsien gyaeundei daenj buhhau nei ndwn youq gyangmbwn, loh’ok najriu ronghsag ndeiyawj de, gyoengqvunz ngonzyawj ronghndwen, lumj youq ndaw loq- fangzhwnz nei.

Gou itmienh gwn bingjronghndwen, itmienh haeujmaez ngonzyawj aen ronghndwen ronghsag ngyaeundei neix, ndaw bak nam naeuz: “Rongh- ndwen seizlawz miz, laeujfiz cam gwnzmbwn……”

（haj nienzgaep Linz Siengzyi)