Ndwen gonq, ranz gou cawx ndaej gyaq ci he, daengx ranz vunz angq raixcaix. Daxboh daiq gou caeuq daxmeh hai ci bae cauhsi cawx doxgaiq, hoeng daxboh hai ci baenq haujlai nanz cij dingz ndaej ci, giz dingz ci liz cauhsi haemq gyae. Ma daengz ranz couh engq mazfanz lo, ndaw siujgih hix mbouj miz dieg dingz ci, daxboh cijndei dawz ci dingz youq naj aenlaeuz. Daxmeh raen le naeuz: “Ae, baezneix gyaqci doek mbouj ndaej lo!” Gou baez yawj, naj laeuz laeng laeuz cungj dingz haujlai ci, yienghneix dingz ci caen yingjyangj vanzging ndaw siujgih ha! Danghnaeuz heiqci ndaej bienq iq couh ndei lo.

Gou siengj fatmingz cungj heiqci bienq ndaej iq he. Gyoengqvunz cijaeu naenx aen anniuj nding gwnz ci, gyaqci couh rox gag bienq iq, ndaej cuengq haeuj daehbuh bae roxnaeuz gaem youq ndaw fwngz. Mwh gyoengqvunz siengj yungh ci, cijaeu naenx aen anniuj heu gwnz ci, gyaqci couh rox menhmenh bienq hung, bienqbaenz gyaqci cingqciengz yienghneix hung. Miz cungj heiqci yienghneix bienq ndaej hung’iq, couh caiq hix mbouj yungh yousim gyaqci mbouj miz dieg dingz lo.

Gou aeu aen siengjfap neix lwnh daxmeh nyi. Daxmeh haenh gij siengjfap gou ndei, mboujgvaq daxmeh lwnh gou yaek ndeindei doegsaw, gaemdawz bonjlingx ak, majhung le cij aiq ndaej saedyienh aen lijsiengj neix.

Gyanghaemh, gou daiq aen siengjmuengh ndei neix ninzndaek lo. Gou loqraen swhgeij baenz boux canghsezgi ndeu, sezgi ok cungj ci moq bienq ndaej iq he. Gou dawz de guh huqlaex soengq hawj daxboh, daxboh caeuq daxmeh naengh youq ndaw gyaqci gou fatmingz haenx, angqfwngfwng riu dwk, gou hix angqfwngfwng riu dwk. (it nienzgaep Sunh Bozhanz)