Laeng ranz daxdaiq bonjlaiz dwg benq diegfwz he, baez daengz fwn doek couh engq mbouj ndei byaij. Daxdaiq coengmingz moix baez loh gvaq cungj lai yawj geij mbat, lumj cingq vehnda aen gunghcwngz hung he. Mwngz yawj, lij caengz gvaq ndaej ndwen he, daxdaiq gvakgvak cingjcingj, couh lumj boux canghfapswd ndeu, diegfwz bienqbaenz aen suenbyaek hung he.

Daj aen suenbyaek neix cingj ndei le, gou bae ranz daxdaiq couh engq lai lo.

Ciuqgaeuq dwg aen rok de, ciuqgaeuq dwg aen bat de, mboujgvaq youq ndaw da gou, gyoengqde couh bienqbaenz “hongdawz cienmonz” gou bae laeng ranz guhhong lo. Daxdaiq caeu doengj raemx he hwnjdaeuj, gou caeuq daxdaiq doxcaez “hihi hoho” ram daengz laeng ranz bae, rwed raemx hawj go’byaek, gaem aen rok, daek rok raemx he, yungh rengz rwed hwnj gyangmbwn bae: “Fwn doek lo, fwn doek lo!” Gou ndwn youq gwnz roen rin bu baenz haenx faengzfwdfwd, buet bae buet dauq, daengx aensuen cungj dwg sing riugaekgaek gou. Daxdaiq youq henz ndiepgyaez dwk yawj gou, mbouj laengz gou, caih gou faengzfwd rwed raemx guhcaemz. Daenj haizraemx、daenj madfwngz, cang lumj boux vunzguhnaz nei, gou hainduj ciemz rum lo. Gou maeuq roengzdaeuj, daj baihswix menhmenh daenq gvaq baihgvaz. Raen go rum he, gou vaiqvet iet fwngz gvaqbae, fwngz he naenx namh, fwngz he dawz gorum lienz rag ciemz hwnj, swnh fwngz vut haeuj rienghmou bae, caih duzmou cawqceq. Gou gamj- daengz swhgeij lumj boux cien’gya baet dileiz nei, gij rum couhdwg “dileiz” gou yaek baet haenx. Vihliux mbouj hawj go’byaek “deng sieng”, gou itdingh baet seuq “dileiz” bae.

Baeg lo, dawz fan mbinj he daeuj, bu youq gwnz dieg, ninz youq gwnz de, cungj miz rumzliengz ci daeuj fifi. Ninz roengzdaeuj cij raen gwnzmbwn geijlai lamz ha, lamz ndaej sawndikndik. Youh miz raq rumz he ci daeuj, gwnzmbwn mbin daeuj geij duj fwj, gij fwj de hix dwg sawcangcang, beij naehau lij hau, ninz youq gwnz de itdingh gig cwxcaih ba!

Suenbyaek daxdaiq ciengxlwenx miz mbungq- mbaj mbin, dujva hai; doihduz byaij youzyet, siengj gwn maz couh gwn; lwgbieng siengj maj geijlai raez couh maj geijlai raez, makyungz siengj bienq geijlai nding couh bienq geijlai nding; swnh fwngz baez vax, cungj miz doenghyiengh ndei, moeggva、byaekheu、duhnoh……

Doenghbaez bae gip sae, cadi doek raemx; doenghbaez bae mbaet va, cadi loengloh. Ceiq gyaez yawj gaeqmeh faeg ok gaeqlwg, ceiq gyaez va’byaek lajmbanj, yamq din yamq riz he, dujva go’nywj cungj miz cingzngeih, gou caeuq aensuen daxdaiq, dwg gojgaeq seiziq gou.

（Vuzyangz Lozlinz)