Mbatmbat de cungj angqvauvau gvaqbae, naiqnueknuek doxdauq.

Ngoenzneix, de youh rag yamqdin naetnaiq, daj diuz roennou henz dah byaij maranz, ndawsim gig hojsouh, lwgda cungj cim mehlwgdin bonj- faenh, gikgyakgyak byaij dwk.

“Vei! Mwngz maj miz lwgda caengz?”

Fwt dingj gyaeuj sing naeuz ndeu, hwk de baez he, ngiengxgyaeuj hwnjdaeuj, cij raen seiq haj boux dahsau dangqnaj byaij gvaqdaeuj, moix boux gwnz mbaq cungj rap miz song gwed fwnz, hung raeuh, deng Lungz Byauh dangj diuz roennou, gyoengqde mbouj ndaej byaij gvaq- daeuj.

Lungz Byauh mbouj eiqseiq doq riu doq vuengmuengz bienq roen.

Geij boux dahsau doq daj henz ndang de rap fwnz byaij gvaq, doq riunyumnyum gangj manz:

“Caen dwg dahsau byaij roen, lwgda yawj byaidin ne!”

“De dwg dahsau gvai ne, baenzlawz lumj sou nei baenzneix manz……”

Lungz Byauh youh hozhwnj youh najmong, nyengq ndang ndwn youq henz roen, dacaengz gyoengqde.

Sawqmwh, miz faj naj ngoenz naemj hwnz niemh he, youq ndaw 5 boux dahsau gyoengqde, de daenj aen mauhdiemx he, gwnz mbaq song gwed nya nyoengqnywtnywt ceng mbouj geijlai dangj faj naj de lo, danghnaeuz mbouj dwg song lwgda youh rongh youh hung myaeg coh bonjfaenh baez he, Lungz Byauh itdingh nyinh mbouj ok boux dahsau daj henz ndang de byaij gvaq neix, dwg boux dahsau fangzhwnz de loqraen haenx.

Mwhhaenx de couh nyengh lo. Gyoengq dahsau neix gaenq byaij ndaej gig gyae lo, de lij ndwn youq henz roen ngaez.

“Dwg de! Couhdwg de!!”

Lungz Byauh youq ndawsim hemq, sim’angq ndaej gaemh ndaet le gaemgienz, gig maqmuengh ndaej sikhaek riengz baihlaeng gyoengqde itcig soengq de maranz. Doenghgij ngoenz neix, Lungz Byauh hix mbouj rox daeuj ra de geijlai baez lo, seizneix ndaej bungzraen le, dauqfanj mbouj rox baenzlawz guh cijndei.

(caengz sat)