“Cin hah daengz cou doeng,

Mbouj doxdoengz geiqciet,

Ndaem haeux ndaem maenz biek,

Mbouj deng iek ndwenngoenz

……”

Hot fwen《24 Cietheiq》hagdangz dou gag bien, gij sing fwen rwenzrwz ndeidingq, gyamq sim haeuj bwt. Gij yaemdiuh Vahcuengh biu hwnj biu roengz mbinfefe, roxnyinh lumj raemxmboq sawdikdik caemhcaiq danhmwdmwd ndaw bya, lumj fwjmok fouzfangfang gwnz mbwn, hawj vunz sim sangjfwtfwt. Gyoengq doengzhag ngoenznaengz eu fwen angqfwngfwng, ndaej rox bouxguhnaz gaemdawz gij gvilwd mbwnheiq geiqciet bienqvaq, gohyoz anbaiz gij hong ndaem naz ndaem reih, gamjsouh daengz gij vwnzva Cunghvaz minzcuz raeuz gvangqlangh naeklaeg.

Hagdangz dou dwg aen hagdangz lajmbanj ndaw cin, gij hagseng dingzlai cungj dwg ranz youq lajmbanj bonjdieg, gyoengqde lailai noixnoix cungj ndaej Fwencuengh gyueknyumx. Vihliux swnjcienz gij vwnzva fwen- liuzloz, Lij Swngcwngz yaucangj daraeh yawj ndaej gyae, daj bi 2014 hwnj couh dawz fwenliuzloz haeuj hagdangz, dawz gak cungj neiyungz ndei yungz haeuj ndaw gij hong son hagseng guh fwen bae.

Roengzrengz guh geij bi le, bi 2018 ndwen 2, hagdangz dou couh baengh aen hanghmoeg swnjcienz fwenliuzloz, aeu ndaej aen mingzdaeuz “Daengx Guek Cungh Siujyoz Cunghvaz Youhsiu Vwnzva Yisuz Cienzswnj Yozyau”. Siusik baez cienz dauqma, daengx gyoengq lauxsae hagseng saetsaet diuqdiuq, angqangq yangzyangz!

Lij yaucangj leihyungh gak cungj youhsi, daiqlingx gyoengq lauxsae hagseng youq gwnz dangz、gwnz banhvei、laj guekgeiz eu fwenliuzloz, yiengjsouh gij gyaeundei Fwencuengh, doengzseiz lij aeu fwenliuzloz daeuj senhconz sevei cujyi haedsim gyaciz- gvanh. Gyoengq lauxsae gag bien gij fwenliuzloz, lumj 《Fwen Roxlaex》《Fwen Ancienz》. Hagdangz lij doeng- gvaq wzdungzcez vwnzyi biujyienj caeuq yenzdan vwnzyi biujyienj, doenggvaq banjbau、gvangjbo daengj, aeu gij fwenliuzloz daeuj son hagseng roxsoq roxyiuj.

Hot fwen《Guek Raeuz Ndaej Fukhwng》Lij yaucangj sij haenx, youq dieg dou ciengq ndaej hoengh raixcaix. Aen sibinz gyoengq lauxsae hagseng biujyienj ndaej ngeihdaengj- ciengj Aen Hozdung Bingzbeij Yingj- siciengj Gaiq Daihcib Namzningz Si Cungh Siujyoz caeuq ngaenzciengj Cunghyangh Den’gyaugvanj Hag- dangz Yingjsi. Doeklaeng lij ndaej daegdaengq iu bae camgya Aen Doxdax “Segih Damingzsingh”Gvangjsih Densidaiz cawjbanh. Lij ndaej camgya Bi 2016 Gvangjsih Minzgoh Yisuzcez Bozvuzgvanj Gohdaiz bae yienjciengq fwenliuzloz.

Hagdangz lij cujciz Aen Doxdax Eu Fwenliuzloz——“Mbaq Dawz Rapnaek, Nduen Loq Liuzloz” Bi 2016 Yenzdan, ndaej youq gwnz lanzmoeg《Yauyenz Caisen》Nanzningz Densidaiz boq okdaeuj. Hagdangz laebdaeb gawjbanh bi 2017、bi 2018 caeuq bi 2019 “Sam Nyied Sam” Bouxcuengh Minzcuz Vwnzvacez, cungj baenz dangqmaz. Bi 2017 ndwen 6 ngoenz 11 daibyauj Liengz- ging Gih bae camgya gij hozdung “Hawfwen Bouxcuengh Haeuj Hag- dangz Cwngzgojcanj”, ndaej caeuq gyoengq daibyaujdui hagdangz daengx si gak yienh (gih) itheij biujyienj gij fwen.

Dou aeu son fwenliuzloz aen banhfap neix daeuj son’gyauq hag- seng, hawj gij hong doicaenh cizlieng gyauyuz hagdangz dou ndaej gaihcanj ndaej hoenghhubhub. Gyoengq hag- seng ndaej angqfwngfwng ciepcoux gij vwnzva minzcuz, dou guh lauxsae ganq gyoengqde hungmaj baenzvunz baenzcaiz.

Gyo ndaej fwenliuzloz, gij fungheiq gij yienghsiengq gyoengq hagseng aen hagdangz dou cungj ndaej bienq ndei haujlai. Hagdangz aeu “fwngz iq rag fwngz hung”, daj fwenliuzloz hwnjdin, coh gyahcangj coh sevei cienzboq gij vwnzva Boux- cuengh, vih gij minzcuz vwnzva maenhndei ciuhgeq raeuz ndaej fuk- hwng okrengz.

Seizneix, fwenliuzloz gaenq ciengq ok le gij daegsaek hagdangz dou, ciengq ok le gij vwnzmingz Nazheuj! Gyoengq lwgnyez Mbanj- cuengh cingq menhmenh hungmaj baenz vunz, maqmuengh gij vwnzva Bouxcuengh miz vunz daeuj swnjcienz daeuj cienzboq!