●9 nyied 19 hauh daengz 23 hauh, Cauhbingz Yen banh aen hozdung“aenboi lijyouz guhdaeuz”doxdax minzcuz cienzdoengj dijyuz. Ndawde doxdax hanghmoeg miz bau giuzcaw、bau aendomq caeuq baenzdoih vit feihbyauh, daengx yienh gungh miz 100 lai boux gak cuz ginzcung camgya hozdung.

（Hoz Vazlanz）

●9 nyied 23 hauh, Bingzgvei Gih banh bansonlienh minzcuz cunghgyau cwngcwz lijlun caeuq guh hong cauhlaeb minzcuz doxgiet baenaj. Gungh miz 50 lai boux camgya sonlienh, gyoengqde dwg doenghboux ganbu ndaw gih neix gak yanghcin、gak bumwnz, gak bouxcwngzyenz ndaw Bingzgvei cihbu gak minzcuj dangjbai、doenghboux daibyauj ndaw cihsiz fwnswj lenzyizvei rog dangj daengj.

（Vangz Ligenh）

●9 nyied 25 hauh, aen hozdung 2020 nienz Hozciz Si“lajmbanj banggungz”gagnyienh fugsaeh caeuq aen cawjdaez hozdung“ngoenzciet raeuz·ciet betcibngux”youq Lozcwngz Mulaujcuz Swciyen Swbaj Cin Dasanh Cunh gawjbanh. Ngoenz de, gyoengqvunz guh hong fugsaeh de fat 300 faenh swhliu hawj vunzlai, coengh 30 boux ginzcung yawjbingh, coengh 20 boux feigyaeuj, camnai 15 hoh ranzgungzhoj.

（Luz Ciuhyinz）

●9 nyied 25 hauh, Nanzfangh Denvangj Gvangjsih Liujcouh Yungzanh Gunghden Giz guh aen hozdung son’gyauq aigoz cujyi aeu“dawz ndei diuzrap, laebdaeb baenaj”guh cawjdaez. Aen hozdung neix caeuq betcibngux、gozging song ngoenzciet neix doxgap, gyoengq gunghyinz baiz ok gij doz “mbaw geizguek”、 yiengh saw “71”、 doz yezbingj daengj, comz rengz baijok gij yienghsiengq ndei gyaez guek、gyaez ranz、gyaez hong.

（Cinz Ginghoz）