9 nyied 25 hauh banhaet, doenghboux ndaw aendoih angqhoh Daengx Guek Yinzda Minzveij、Guekgya Minzveij, doenghboux ndaw aendoih daibyauj Swcigih、Gveilinz Si, caeuq gyoengq dangjyenz ganbu ginzcung Gunghcwngz Yauzcuz Swciyen, gungh geij cien vunz doxcomz guhdoih, angqhoh aen swciyen neix laeb ndaej 30 bi gvaq.

Banhaet 9 diemj, aen daihhoih angqhoh heijdaeuz. Gak gaep gak baih daibyauj youq gwnz daihhoih gangjvah. Youq ndaw vah gyoengqde, gyoengq bouxdaeuz baih Guekgya caeuq Swcigih、Gveilinz Si de cungj haenh Gunghcwngz Yauzcuz Swciyen 30 bi daeuj guh baenz haujlai saeh, caensim angqhoh Gunghcwngz caeuq vunz Gunghcwngz gvaq ndaej ndei, caensim maqmuengh Gunghcwngz coglaeng hwngfat lai ndei caeuq vix gyoengqde baenzlawz hwngfat lai ndei.

Mwh hai daihhoih angqhoh, gyoengqvunz Yauzcuz aen yienh neix daenj ndangdaenj gyaeundei, gyoebbaenz gak aendoih doxlwnz yienj cezmuz ndeiyawj dangqmaz. Hai sat aen daihhoih angqhoh, gyoengq hek daengz giz langhbaij yawj aen swciyen neix laebbaenz 30 bi doxdaeuj guhbaenz gijmaz, lailai rox gaxgonq vunz Gunghcwngz baenzlawz caezhoz buekguh、haenqrengz hwngfat baenaj caeuq guh baenz gijmaz saeh hungloet, vanzlij vunz gak cuz ndaw yienh neix miz saenqsim youq giz moq seiz moq hwnqguh“aen Gunghcwngz gyaeundei、aen Gunghcwngz mwnhoengh、aen Gunghcwngz miz vwnzva、aen Gunghcwngz fouqmiz、aen Gunghcwngz vwnzmingz、aen Gunghcwngz vuenyungz”.

（Veiz Sangyungz Sung Vwnz Liengz Cingz）