Haemhlwenz, gou yawjraen go vameizgveiq gou ndaem de hai va lo. Hai song duj va henjrwkrwk bae. Raq rumz ndeu ci gvaqdaeuj, song duj vameizgveiq henjrwkrwk de naihnaih bibuengq, sawqmwh mbin hwnjdaeuj, bienqbaenz song duz mbungqmbaj henj youq henzgyawj gou mbinfiufiu, liux youh sawqmwh dingz youq gwnz song diuz mengq gou, bienqbaenz song aen hotmbungqmbaj henjrwkrwk youh gyaeundei.

Gou angqfaengz liux, couh ndiu lo, nditndat daj bakdangq ciuq haeuj gwnz mbonq daeuj. Gou couh bae ciuq gingq, guhlawz gwnz mengq saek yiengh cungj mbouj miz ne? Song aen hotmbungqmbaj gyaeundei de bae gizlawz lune? Dwg mbouj dwg youh bienqbaenz mbungqmbaj mbin dauq go vameizgveiq de bae, bienqbaenz song duj va lune? Gou couh doq bae gyanghongh yawj, hoeng, go vameizgveiq de saek duj va cungj mbouj miz nauq! Dwg mbouj dwg youh bienqbaenz song duz mbungqmbaj mbin deuz lune? Yawj vei! Duz meuzraiz manz de naengh youq bangxhenz bat vameizgveiq swiqnaj, itdingh dwg duzmeuzraiz yaek bae gaeb gyoengqde, gyoengqde couh mbin deuz lo——Bingzseiz miz duzmbungqmbaj mbin haeuj gyanghongh daeuj, duzmeuzraiz baezbaez cungj gyaep gyoengqde, coemj gyoengqde, yaek gaebdawz gyoengqde.

Hai! Duz meuzraiz manz neix!

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）