Gou miz aen sibgvenq ndeu—— maij dawz mbangj mbawfei yungh gvaq haenx、mbawsiengq cingjleix baenz baenz cek, lij youq henz sij hwnj gangjmingz. Mwh ndaej hoengq, gou couh dawz okdaeuj yawj. Daxmeh naeuz gou dwg boux vunz ndawsim miz cingz he. Gou roxnyinh, dauqngeix doenghbaez, cij engqgya insik seizneix.

Ndaw cekde nem miz mbawfei haenx, feidenyingj dwg gou yungh sim daeuj cingjleix. Gangj hwnj mbawfei denyingj, mbouj ndaej mbouj gangj daengz ndawde sam mbaw. Henz fei biu miz “gou gyaez mwngz, guekcoj” geij cij saw neix. Sam mbaw fei neix dwg sam mbaw fei denyingj《Hungzhaij Hengzdoengh》gou caeuq daxboh daxmeh doxcaez bae yawj haenx. Cungsim saehgienh bouh denyingj neix dwg “ciepma Vazgyauz”, hawj gou yinsieng gig laeg. Gawq gangj, bouh denyingj neix dwg gaengawq saehgienh caensaed gaijbien baenz. Guekgya raeuz cingqcaih hung’ak, vunzlai yied daeuj yied vuenyungz. Gwndaenj youq aen guekgya vuenyungz neix, moix boux vunz Cungguek cungj vih gij cingsaenz ndaw denyingj haenhdanq haenx saenqhwnj.

Ndaw cekde, miz mbawsiengq gou, hix miz mbawsiengq daxboh daxmeh. Miz mbaw siengq he dwg youq ndaw Sinjyangz Gunghyez Bozvuzgvanj ingj. Ndaw siengq dwg gou ndwn youq baihnaj gyaq cigunghgyauh gaeuqgeq he, gyaq cigunghgyauh neix “gwnz gyaeuj” miz song diuz lienh, lumj song diuz mengq nei. Daxmeh heuh de guh “cigunghgyauh mengqhung”. Daxmeh naeuz, de mwh iq couh naengh cungj cigunghgyauh neix. Riengz dwk gohgi cinbu, cungj cigunghgyauh neix mbouj yungh lo. Seizneix raeuz cij ndaej youq ndaw bozvuzgvanj yawjraen gij yiengh de lo.

Doenggvaq mbawsiengq caeuq saedceij ngoenzneix doxbeij, raeuz ndaej yawjdaengz seizdaih bienqvaq. Miz mbaw siengq ndeu, dwg gou mwh lwgnding, daxmeh umj gou dwk dienhvah, aen soujgih de dwg aen soujgih geq goengnaengz genjdanh he. Seizneix, vunzlai yungh soujgih cinaengz, gij goengnaengz de couh lumj aen dennauj he. Neix youq doenghbaez siengj cungj mbouj gamj siengj. Gohgi fazcanj ngoenz beij ngoenz ndei, saedceij raeuz couh lumj goraz hai va——hoh beij hoh sang.

Gou vih gou dwg vunz Cungguek ndaengmoj, gou vih gou gwndaenj youq aen seizdaih neix roxnyinh miznaj! Gou gyaez guekcoj gou caeuq mbanjranz gou, neix dwg cungj cingz ndawsim ndeu, engq dwg cungj hengzdoengh ndeu. Gou itdingh ndeindei doegsaw, ndeindei majhung, daengzcog vih guekgya gensez dem cien gya vax!

(Cangh Yizcenh)