“Geiznding hajsing nyigrumz mbinmyag, singgo ndaejhingz geijlai goksag, haenhciengq guekcoj ndeigyaez gyoengqraeuz, daj neix byaij coh hoenghvuengh fouqak……” Moix baez ciengq souj go neix, ndawsim gou cungj gig gikdoengh. Gou vih gou dwg vunz Cungguek miznaj, gou vih gou seng maj youq aen guekcoj hungmbwk neix miznaj.

Guekcoj, gou vih mwngz miznaj, aenvih mwngz diegguek gyaeundei. Daj gwnz deihdoz yawj, mwngz lumj duz gaeqboux ngiengx gyaeuj ciengqgo nei, daengj youq baihdoeng seiqgyaiq. Diegsang dieggumz hwnjhwnj roengzroengz, megbya、dahraemx vangraeh gyauca, gyoebbaenz baenz fuk baenz fuk dozveh byaraemx gyaeundei. Baihnamz giuz iq raemx lae, baihbaek naehau gvangqlangh, baihsae langhloet gvangqyup, doengh gijneix cungj hawj vunz louzlienh haeujmaez, youh baenzlawz mbouj hawj gou miznaj ne?

Guekcoj, gou vih mwngz miznaj, lij aenvih mwngz lizsij gyaeraez、vwnzva ronghsag. Mwngz dwg “seiq daih guek ciuhgeq vwnzmingz” seiqgyaiq ndawde aen ndeu, miz lizsij vwnzmingz raez daengz haj cien bi. Gij lizsij gyaeraez neix, cwkcomz le vwnzva ronghsag mwngz gag miz haenx: Cangzcwngz fanhleix seiqgyaiq mizmingz、Baekging Gugungh heiqseiq hungmbwk ndeiyawj、seiq daih fatmingz vunzvunz cungj rox…… Gijneix cungj hawj vunz haenh mbouj dingz, youh baenzlawz mbouj hawj gou miznaj ne?

Guekcoj, gou vih mwngz miznaj, engq dwg aenvih mwngz lwglan lai raeuh、hoenghvuengh fouqak. Mwngz dwg daxmeh hungmbwk gwnzbiengz, seiqseiq daihdaih raekciengx lwglan geq cungj geq mbouj liux, vanzlij lwglan maenndei okyienh mboujduenh, geq mbouj rox sat. Youq Cungguek gungcanjdangj lingjdauj baihlaj, guekgya ginghci riengjrit hwngfat, gohyoz gisuz fwt mbin vaiq bae, saedceij yinzminz youq onj maij hong. Gijneix cungj sawj seiqgyaiq gak guek yinzminz aeu da moq yawj mwngz, gijneix baenzlawz youh mbouj hawj gou miznaj ne?

Gou yaek sing hung doiq mwngz gangj: Guekcoj, gou vih mwngz miznaj!

(seiq nienzgaep Cai Meijnungz)