Lungz Byauh deng de gangj ndaej itseiz mbouj miz vah bae dap, cij ngawhngawh yawj de faenjnaeuj le buhvaq, cuengq youq ndaw bat iq, doeklaeng bungj aen bat ndwn hwnjdaeuj, cienq ndang byaij coh haenzdah bae.

Gij yiengh de byaij loh caen ndeiyawj ha! Hwet saeqleklek, ndang byombyangbyang, aen bat coq buhvaq deq youq gwnz hwet, diuz mengq raezrang youq laeng bibi buengq- buengq, baez yamq hwnj mbaeklae haenzdah, hwet de couh loq mbitmbieng baez ndeu, rag diuz mengq raezrang haenx hix ning song baez, hawj Lungz Byauh ndwn youq henz dah ngiengxgyaeuj yawj ndaej aen sim diuqbubbub, miz cungj cingzeiq gangj mbouj ok.

Lumj miz cungj rengz geizheih dawzyinx de, gyaegyae riengz youq baihlaeng de, muenghraen de byaij haeuj le bakdou aen ranzcien ndeu, Lungz Byauh lij youq rog dou gvaeh bae gvaeh dauq. Danghnaeuz mbouj dwg henz giemxdou maeuq miz duz ma hung yak he, Lungz Byauh caen siengj caiq byaij gyawj di bae lah coh ndaw bakdou bae.

Dahsau haenx lumj rox de couh youq rog dou, haeuj dou le couh caiq hix mbouj okdaeuj lo, hawj Lungz Byauh youq baihrog caj le haujlai nanz, doeksat lau vunz ndaw mbanj ngeizvaeg, cij doeknaiq caemhcaiq gig sij mbouj ndaej lizbae lo.

Yienznaeuz ngoenzhaenx Lungz Byauh sai le haujlai rengz cij cam rox diuz roen maranz, hoeng aen sim de cix gaenq doek youq henz dah heusausau haenx, deng dahsau haenx gip bae lo.

Haujlai ngoenz, de cungj nyap- saebsaeb, lumj miz saeh naek yo youq ndawsim, gawq mbouj miz yinxdaeuz caeuq gyoengq lwgnyez ndaw mbanj guhcaemz, hix mbouj nyienh caeuq daxmeh bae ndaemnaz, mizseiz lienz haeux hix gik gwn.

“Ah Byauh ha, mwngz gyawz mbouj cwxcaih la?”

Daxmeh de doxndiep cam de, laihnaeuz daeglwg ndaej maz bingh, sam baez haj mbat yaek daiq de hwnj haw bae ra canghyw yawjbingh.

“Mbouj miz maz ha!”

Lungz Byauh bibi gyaeuj, ndoj gvaq da daxmeh de.

“Miz bingh couh aeu gangj ha! Yawj bingh dwk yw cij ndaej ndei ne, yo hwnjdaeuj youh mbouj nyienh bae yawj canghyw mbouj ndaej bw.”

Daxmeh de lij gangjdawdaw.

(caengz sat)