Bi duzyiengz goengheij,

Daihgya ndaej fouqmeiz (fouqmiz),

Saedceij gvaq ndaej ndei,

Diemz lumj ceizsimraz.

Goengheij bi duzyiengz,

Bi lai giengz gvaq bi,

Raeuz cienz guek gak giz,

Giz beij giz gyaeundei.

Goengheij bi duzyiengz,

Vunzraeuz ciengz vuenyungz,

Saedceij lumj feiz hoengz,

Buz goeng angq diuqfoux.

Goengheij bi duzyiengz,

Doq buet yiengq gizndei,

Vunzlai sim doengzcaez,

Goengqbya ndaej senj bae.

Goengheij bi duzgaeng,

Guh naz caeng sanjliengh,

Miz fouq guek youh giengz,

Ndawbiengz ndaej andingh.

Goengheij bi duzgaeng,

Bilaeng youh lai moq,

Cien ranz caeuq fanh hoh,

Ndwenngoenz hoj bienq diemz.

Goengheij bi duzgaeng,

Ndwencieng daengz sim’angq,

Ranzranz dem gyadangq,

Angqriu humx henz rwz.

Goengheij bi duzgaeng,

Coengzlaiz caengz raen gvaq,

Aenbiengz gwnz daengz laj,

Faengz lumj max hwnj mbwn.

Goengheij bi duzgaeng,

Caengzcaengz miz bienqvaq,

Daj gwnz ma daengz laj,

Dujva hai angjda.

Goengheij bi duzgaeq,

Beksingq ndaej leih lai,

Vunzvunz cungj fatcaiz,

Rox geijlai vuenheij.

Goengheij bi duzgaeq,

Vunzvunz ndaej vuenyungz,

Ndwenngoenz lumj feizhoengz,

Gvaq saedceij soengset.

Goengheij bi duzgaeq,

Bouxboux ndaej gizleih,

Ndwenngoenz ndei fouzbeij,

Lumj byaleix bienq lungz.

Goengheij bi duzgaeq,

Bouxboux ndaej fatcaiz,

Ranzranz cungj miz lai,

Lumj gwnz gai bakhuq.

Goengheij bi duzgaeq,

Gizgiz ndaej vuenh moq,

Lwgminz ndaej duethoj,

Raeuz guekcoj fanzyungz.

Goengheij biz duzgaeq,

Bibi ndaej doxhwnj,

Lumj gwihmax hwnjmbwn,

Saehnieb mbin lumj naq.

Goengheij bi duzma,

Raeuz daihgya hwngvuengh,

Lwnh Dieggun Diegcuengh,

Gizgiz vuengh lumj feiz.

Goengheij bi duzma,

Raeuz gyagya cungj hoengh,

Cwngfuj daeuj daiqdoengh,

Miz baenzboengj ngaenz caeu.

Goengheij bi duzma,

Raeuz daihgya vuenheij,

Youq gizneix hohheij,

Bouxboux ndaej fatcaiz.

Goengheij bi duzma,

Hoh daihgya ndangcangq,

Miz baenz fanh gyadangq,

Angq lumj dangh bienq lungz.

Goengheij bi duzma,

Daihgya caez angqhoh,

Giz canh ngaenz rim doh,

Caez byaij coh siujgangh.

Goengheij bi duzmou,

Ndaej fungsou dem sanj,

Lwnh gwnz haw gwnz mbanj,

Fouqmiz fanh cienzcaiz.

Goengheij bi duzmou,

Boux caeuq boux doxgyaez,

Doengzcaez guh hwnjbae,

Caez gvaq ndei saedceij.

Goengheij bi duzmou,

Haidou couh ndaej leih,

Mboujlwnh guh maz saeh,

Gienhgienh ndaej baenz ndei.

Goengheij bi duzmou,

Demsou geijlai mangx,

Gomiuz maj ndaej cangq,

Ndawsim angq raixcaix.

Goengheij bi duzmou,

Raeuz bouxboux baenz ndei,

Ndwn youq aen diendeih,

Gyoengqraeuz ndaej bingzan.

Cibngeih duz goengheij,

Eu daengz neix couh yuenz,

Yied eu sim yied vuen,

Louz fwen cienz fanh daih.

(sat)