Gou daj iq couh gyaez duz- douqhau, douqhau dwg cungj doenghduz gvaigvet unqswnh he, aiq dwg aenvih cungj singq neix, ndigah gyoengqde youq ndaw goj- lwgnyez gij yiengh de gig dwggyaez.

Douqhau daengxndang yungz- yupyup, lumj ndaek dangzfaiq hung he, hawj vunz nyaenx mbouj ndaej siengj haeb gaemz he. De miz lwgda nding’yan、 aenrwz raez- rangh、diuzrieng dinjdet, lij miz aenbak sam dip daegbied he, lumj go’nywj mbawsamdip nei.

Mwh de gwn doxgaiq couh loh ok song gaiq heujnaj youh hung youh raez. Song gaiq heujnaj gou hix gig hung, miz vunz naeuz gou mwh riu couh lumj lwgdouq, hojsik gou sug duzlungz, mbouj sug duzdouq, danghnaeuz gou ndaej gaij baenz sug duzdouq couh ndei lo.

Daxmeh cawx duz douqhau ndeu hawj gou. Gou aeu siengceij guh aen rongz ndeiyawj he hawj lwgdouq, youq ndaw siengceij bu hwnj bauqceij dangguh aen- mbonq lwgdouq. Gou lij youq baihndaw cuengq aen vanj he hawj de coux doxgaiq gwn. Gou mbouj raix raemx hawj de, aenvih gou dingq daxmeh naeuz, duzdouq moix ngoenz gwn byaek couh ndaej bouj gaeuq raemx ndaw ndang de aeu haenx, mbouj caiq lingh gwn raemx lo.

Gou moix ngoenz cungj aeu lauxbaegnding caeuq byaekheu gueng duzdouq, duzdouq hix maij gwn gak cungj mak. Yawj gij yiengh de ngaem gyaeuj nyinhcaen gwn doxgaiq, simcingz gou hix bienq ndaej ndei lai lo.

Miz seiz, gou iet lwgfwngz gvaq bae hawj de, ndaw fwngz mbouj miz doxgaiq, bak de hix iet gvaqdaeuj. Fwngz gou daenq bae daenq dauq, de hix riengz daenq bae daenq dauq, lumjdwg dawz lwgfwngz gou dangguh doxgaiq guhcaemz, dwggyaez dangqmaz!

Gou gig gyaez duzdouqhau, de hawj ndaw gwndaenj gou daiq daeuj haujlai yinxdaeuz. Gou an aen coh he heuh “bwzsez gungh- cuj” hawj de, gou itdingh henhoh ndei de, mbouj hawj de deng sieng.

(ngeih nienzgaep Linz Singhyi)