Haetromh, gou ninz ndiu lo. Gou yawj coh rog cueng: Yi, ranzlaeuz baihrog baenzlawz bienq sang lo, cungj yawj mbouj raen dingj laeuz bw? Yawj ndaw ranz, ndaw ranz baenzlawz cij miz heiqgiuz caeuq sairaiz gak saek gak yiengh daengj doengh- yiengh cang gyaeu, gvih、daiz、sahfaz cungj mbouj raen lo! “Di——” sing ndeu, gou mbouj siujsim daemj deng aen anniuj he, gyasei cienzbouh okdaeuj lo, caen saenzgeiz ha!

Gou ngamq ok dou, couh deng baihrog gingjsaek vava loegloeg maez dawz lo. Boux vunzgihgi ndeu byaij gvaqdaeuj naeuz:“Bouxcawj iq, mwngz dwg daeuj moq ba? Gizneix dwg 25 sigij, gou daiq mwngz yawjyawj.”

Gou simcingz gikdoengh youh ngeizngwd, riengz boux vunzgihgi daeujdaengz gyang singz, gizde aenranz cungj guh baenz yiengh gofaex, vanzlij miz gij goengnaengz lumj gofaex nei sawj hoengheiq bienq cengh, gizde miz cwngfuj bumwnz fuengbienh vunzlai banh saeh, miz hagdangz maenhndei, miz ciugaep bakhuq sanghcangz……

Hagdangz daengzcog saedcaih dwg aen hag- dangz yienghyiengh cungj guh ndaej he. Hagdangz daengzcog baen baenz 100 aen ranghdieg hung, 60 aen ranghdieg iq, laeb miz duzsuhgvanj、gohgi- gvanj、dijyuzgvanj、yinhyozdingh、laigoengnaengz- dingh daengj. Youq gizneix, hix miz doenghduz iq dwggyaez daiq gyoengq lwgnyez ndonj gvaq fwjraiz duj youh duj, youq ndaw damqra mboujduenh sou ndaej cihsiz、gagsaenq caeuq vaiqvued.

“Yi, neix dwg aen angen gijmaz?” Gou vix aen anniuj nding gwnz aenseizgan cam vunzgihgi. Vunzgihgi naeuz: “Gaej naenx aen angen neix!” De itmienh naeuz itmienh iet fwngz laengz gou, youq mwh laengz gou, fwngz de naenx aen angen wnq. Cij dingqnyi vunzgihgi hemq “daengz——” sing ndeu, aenseizgan sikhaek mbin daengz ciugaep bakhuq sanghcangz lo. Doxgaiq ndaw ciugaep bakhuq sanghcangz caen lai ha! Gou cungj yawj dava liux. Yi, gyoengqvunz gizneix guhmaz cungj hai ci haeuj ndaw sanghcangz ne? Vunzgihgi naeuz: “Hwhw, neix couhdwg gij saenzgeiz 25 sigij, mwngz siengj bae gizlawz, cungj ndaej hai ci daengz gizde, mbouj deng hanh saek di! O, seizgan gvaiz lo, gou anbaiz aen rug cwxcaih he hawj mwngz yietnaiq ba.”

Gou menhmenh ngonzyawj aen singz moqsag neix, yienzhaeuh naengh aenseizgan riengjrit ma daengz aenrug ndaw ciujden vunzgihgi gaenq anbaiz ndei haenx. Mwh gou youq bakcueng ngonzyawj gingjsaek gyaeundei, baez mbouj siujsim, gou sawqmwh doek roengz yangzdaiz……

A, gou ndiu lo, raen gou gingqyienz lij youq gwnz mbonq. Laxlawz dwg gou loq lo, ciengz loq neix geijlai ndei ha! Gou cungj mbouj saenq neix cij dwg ciengz loq he!

(ngeih nienzgaep Yangz Hauhih)