Mbatneix, boux dahsau haenx deng Lungz Byauh yawj ndaej ngaemgyaeuj roengzbae lo, diuz mengq raezrang baij youq henz ndang, song cik fwngz haunyo saeqnaeh youq ndaw raemxdah saeg geu buhraiz ndeu, faj naj gyaeundei cij ndaej yawjraen dingz ndeu. Hoeng, Lungz Byauh roxnyinh gig geizheih, de maj ndaej baenzneix hung, youq Mbanj- gyaeujdah baihnaj baihlaeng, hix raen gvaq mbouj noix dahsau lo, coengzlaiz mbouj ndaej raen gvaq dahsau baenzneix gyaetnyaed ndeigyaez, gvaiq mbouj ndaej de cim doeksaet baezneix, gingqyienz yawj ndaej nyengh ndaej ndwn youq gizde, yaepseiz lumz le bonjfaenh dauqdaej youq gyawz.

Nyengh ndaej yaep ndeu, aiq boux dahsau haenx roxnyinh miz maz mbouj ngamj, youh ngiengxgyaeuj hwnjdaeuj, gij lwgda songde youh doxbungz moq. Song gemj dahsau baez nding, cingq yaek caiq ngaemgyaeuj roengzbae, Lungz Byauh mbeihung coh de ngaekgyaeuj riunyumj, habseiz cam coenz ndeu:

“Gizneix dwg gyawz?”

Dahsau dacaengz de baez he, naj caem, dauq cam de coenz he:

“Mwngz yaek bae daengz gyawz bae?”

“Gou dwg vunz Mbanjgyaeujdah hane.”

“Byawz guenj mwngz dwg vunz Mbanjgyaeujdah roxnaeuz vunz Mbanjbyaidah?”

Dahsau ngaemgyaeuj, doq nam doq haenqrengz saeg buhvaq.

“Gou byaij loek lo, mbouj rox baenzlawz byaij dauqbae.” Lungz Byauh lwnh hawj dahsau dingq:“Gizneix dwg mbouj dwg Mbanj- saulengj?”

“Hihi!”

Dahsau riu hwnjdaeuj lo, hoeng lij laebdaeb ngaemgyaeuj gungj hwet saeg buhvaq. (caengz sat)