Cibgouj gaiq seiq cung,

Lumj rumzcin,

Daj Baekging ci daeuj,

Ci ndaej lajmbwn raeuz,

Gizgiz raeuj,

Raemx beij laeuj lai van.

Rumzcin daengz ndaw bya,

Va doek laj,

Caiq hwnj nga giet aen,

Rumzcin ci daeuj daengz,

Caenda raen,

Bouxhoj baenz bouxmiz.

Rumzcin daengz ndaw daemz,

Langh sam caengz,

Raemxgyaeng bienq raemxmboq,

Gaijgwz hai conghdoh,

Baij baenz coz,

Yinx mboqgim riuz ma.

Rumzcin daengz lajmbanj,

Mbanj ndaw bya,

Ranzhaz bienq laeuz sang,

Lajmbanj bienq diendangz,

Lwgminz gangj,

Saedceij van gvaq oij.

Rumzcin daengz ndaw naz,

Haeux fat ngaz,

Ndaej hai va miz faen,

Mbwn ndei yienghyiengh baenz,

Caen dahraix,

Aencang cungj raen rim.

Rumzcin daengz ndawranz,

Raeuz sim’angq,

Mbouj daem yangz muh mba,

Yienghyiengh dengiva,

Doeng den gvaq,

Goeng riengz yah diuqfoux.

Rumzcin daengz gwnz daiz,

Ndei daiq lai,

Bienqbaenz ngaiz riengz noh,

Daengx ranz riuhoho,

Laux iq coz,

Gingq boi hoh siujgangh.

Rumzcin daengz daihloh,

Heiqci moq,

Rox byaij hix rox mbin,

Lwgminz miz ngaenzgim,

Angq ndawsim,

Bae Baekging lijyouz.

Rumzcin daengz ndaw haij,

Raeuz ruzhaij,

Hwnzngoenz byaij mbouj dingz,

Bauj beksingq anningz,

Vunz gwnzbiengz,

Cungj sing angq caez haenh.

Rumzcin doh cienz guek,

Raeuz Cungguek,

Cienzbouh duet gungzhoj,

14 ik lwgminz,

Doengz diuz sim,

Gvaq saedceij vuenyungz.

Rumzcin doh seiqgyaiq,

Loh daiq loh,

Saedcaih doq bienq ndei,

Gaicawx baedauq deih,

Lumj coemh feiz,

Beij gaxgonq hoenghhwd.