Gou miz gonj gangbit gaeuq ndeu, bakbit myaex lo, dungxbit hix doxnem lo. Yawj hwnjdaeuj gonj bit neix wngdang baenz nyapnyaj vut bae lo, hoeng gou cix yawj de dijbauj lai yo hwnjdaeuj, cuengq youq aen gvihsaw giz ronghrigrig, seiz mbouj seiz yawjyawj de, nanz mbouj nanz uetuet de, unqswnh lumhlumh de…… De mboujdanh buenx gou gvaq seiz doegsaw haemzhoj, lij miz aen cingzngeih naeknetnet ndeu.

Seiz gou ngamq doeg cuhcungh, daegbied maqmuengh miz gonj gangbit ndeu. Aenvih seizde ndawranz gungzhoj lai, mizseiz gij ngaenz cawx gyu cawx haj cungj mbouj miz, ndigah aen simnyienh neix cungj mbouj gamj dwen hawj bohmeh nyi, cij laeglemx gangj hawj daxbuz rox.

Daxbuz dingq le, sim’in rubrub gyaeuj gou naeuz:“Lan gvai gou ha, aen simnyienh mwngz daxbuz bang mwngz, hoeng mwngz aeu roengzrengz doegsaw bw!” Gou ngaekgyaeuj ded- ded dapwngq daxbuz. Caen dwg nanzvei daxbuz lo, daxbuz ngoenz- naengz bae ndoi ciengx 5 duz vaiz, lij guh gij hongranz dajcawj dem, de miz maz banhfap rom ngaenz hawj gou cawx gangbit ne?

Gonj bit gou siengj cawx haenx, gai 1.66 maenz, seizneix yawj hwnj- daeuj cienh raixcaix, hoeng seizhaenx gij ngaenz neix ndaej cawx 2 gaen lai nohmou lo. Ngeix daengz couh yaek miz gonj bit habsim lo, lumj ndaej gwn oij nei daj ndawsim roxnyinh vansedsed. Hoeng, aen singhgiz ndeu gvaqbae lo, song aen singhgiz gvaqbae lo…… Lij caengz raen daxbuz dwen gienh saeh neix, gou hix mbouj gamj cam de.

Da raen aen singhgiz daihsam yaek gvaqbae lo, ngoenz singhgizroek banhaemh, daxbuz heuh gou daengz henz ndang de, youq ndaw daeh mbon ok daeb ngaenz ndeu, naj riunyum- nyum sing daemq naeuz:“Ne, lan gvai, daxbuz rom ndaej ngaenz hawj mwngz cawx gonjbit lo, gij ngaenz lw roengz- daeuj mwngz couh gag dawz, aeu mbaet gwn mbaet yungh bw!” Fwngz gaem daeb ngaenz raeujremrem neix, gou gikdoengh ndaej raemxda gvaengz youq ndaw da, aen gyaeuj moek haeuj ndaw rungj daxbuz bae, lienz sing gangj:“Gyo’mbaiq daxbuz, gyo’mbaiq daxbuz!”

Daxbuz ndang iqet, yaek ndaej 70 bi lo, hoeng guhhong hwnjdaeuj miz di hauxseng hix mbouj beij de bw. Vihliux rom ngaenz hawj gou cawx gonj gangbit, daxbuz ngoenznaengz youq duzvaiz rouh boengz seiz, bae ndaw ndoeng ra mbaet ywdoj gai hawj boux canghyw ndaw mbanj, laebdaeb sai le 20 ngoenz! Daeb ngaenz na- nedned, miz mbaw song gak、5 gak…… gungh 2.2 maenz, gij ngaenz neix ndaej daeuj caen mbouj yungz- heih ha! Daxbuz nyienh sinhoj baenz- lai ra ngaen hawj gou bae cawx gangbit, hix mbouj sij ndaej bae cawx geij gaen noh dauqdaeuj gwn, seizneix gou baez ngeix daengz neix cungj gig sim’in.

Doeklaeng, gou ngoenznaengz fwngz gaem gonj gangbit de sij saw hagsib, cungj roxnyinh miz doiq lwgda ndeu youq gizgyawj cimyawj gou, ndawde miz gij maqmuengh naeknet daxbuz, hawj gou engqgya roengzrengz bae doegsaw. Seizde miz di doengzhag ciengz deuz hag bae ra gijgwn bae guhcaemz, yienznaeuz gou mizseiz hix siengj yienghneix guh, hoeng baez yawjraen gonj gangbit neix, gou couh lauxsaed lo. Gou gag nai swhgeij, caiq haemz caiq hoj hix aeu haeb heuj doegsaw, mboujne couh doiq mbouj hwnj daxbuz.

Gonj gangbit neix buenx gou gvaq cuhcungh le, hix miznaj duiyouh lo, yienznaeuz bakbik myaex caemh- caiq dungxbit doxnem lo, hoeng gou lij sij mbouj ndaej vut bae. Cunghconh bizyez le, gou yo de youq ndaw gvihsaw, nanz mbouj nanz dawz okdaeuj yawjyawj. Aenvih de hawj gou maqmuengh caeuq ligliengh, mbouj lau gungzhoj, engq youqgaenj dwg lij miz gij ndiepgyaez daxbuz youq ndawde.

Seizneix, yienznaeuz daxbuz gvaqbae geijcib bi lo, hoeng aen yienghceij de ciengzseiz youq ndaw ukgyaeuj gou, yienj ndaej gig hung- mbwk、gig unqswnh. Gonj gangbit yienznaeuz youh gaeuq youh vaih lo, hoeng de youq ndawsim gou youh gyaeu youh ndei.