Gwnz diegnywj heuyauyau miz aen byukgyaeq “saenzgeiz rox bienq” he.

Gyanghaet, dahcej mbungqmbaj、daeggo duznon caeuq daegnuengx duzmoed doxiu caez okdaeuj guhcaemz, gyoengqde yawjraen aen byukgyaeq ndeiyawj he. Dahcej mbungqmbaj sawqmwh miz aen siengjfap geizgiuj he: “Raeuz yungh aen byukgyaeq guh aennungxningh daeuj guhcaemz ba!” Daeggo duznon、daegnuengx duzmoed doxcaez han naeuz: “Ndei ha! Ndei ha!” Gyoengqde dawz byukgyaeq buen daengz gyang diegnywj heuyauyau bae, youq gwnz byukgyaeq cuengq nye faex iq he, aen nungxningh ndeindi’ndi he couh guh baenz lo. Gyoengqde youq gwnz aennungxningh mwngz saet gou diuq, nungx hwnj ningh roengz guhcaemz angqvauvau.

Gvaq yaep ndeu, dahcej mbungqmbaj youh siengj daengz aen ceijeiq he, “Raeuz yungh aen byukgyaeq neix caiq guh aen gyanglozsanj he ba!” De naeuz. Gyoengqde ra daeuj geij diuz nywj, doxcaez guh ndei aen gyanglozsanj gyaeundei he. Naengh youq gwnz gyanglozsanj, gyoengqde angqfwngfwng riengz rumz mbinyagyag.

Banringz, fwn doek lo. Mwhde, daeggo duznon siengj daengz aen banhfap ndei ndeu, de dawz aenbyukgyaeq bienqbaenz aen liengj ndaej dangj rumz cw fwn he. Gyanghaemh, daxheiz ronghndwen daiq ndaundeiq iq daeuj hwnjban lo. Gyoengqde couh dawz aenbyukgyaeq dangqguh aen mbonq unqnem he, ninz youq baihndaw, raeujrubrub, yaep ndeu couh ninzndaek lo…… （ngeih nienzgaep Vuz Yijgyah)