Gyoengq doengzhag, sou dwg mbouj dwg laihnaeuz gou yaek gangj haenx dwg aengoj duznou caeuq duzmeuz, roxnaeuz dwg gojgaeq Danghmuj caeuq Gezsui ba? Yienghneix sou couh loek lo! Gou gangj aengoj “duznou bungzdaengz duzmeuz” neix dwg baenzlawz yiengh ne? Bouxlawz siengj dingq, couh cingj laebdaeb doeg roengzbae ba.

Gou daeuj gaisau gou swhgeij gonq: Gou heuh Lonz Yinzdanh, dwg dahniq ngeih nienzgaep, bingzseiz caeuq vunz ndaw ranz roxnaeuz baengz- youx ndei youq doxcaez, gou rox gangj rox lwnh, ak gangj ak buek, saedcaih dwg boux “bak lai” he. Hoeng gou bouxvunz baenzneix vuedbued, seizneix cix miz yiengh gazgiengh he hawj gou hamj mbouj gvaqbae——mbouj gamj caeuq lauxsae naj doiq naj doxgangj, raen lauxsae couh siengj deuz!

Saehcingz dwg yienghneix: Ngoenzde cuengq- hag le, gou lumj bingzseiz nei, youq gyausiz sij cozyez sat le couh okbae guhcaemz yaep ndeu. Cingqyouq gou youq lajroq sam laeuz yawj coh baihgyae, sawqmwh dingqnyi singyaem sugsed cingq byaij gyawj gou, sing de caeuq sing gwnz goqdangz yienghneix ndeidingq. Byawz daeuj lo? A! Dwg lauxsae yijvwnz ban dou——Mauz lauxsae!

Gou baez doeksaet, siengj daengz gonq couh dwg vaiq di deuz! Singyaem daj lajroq baihdoeng cienz daeuj, gou ganjgip buet coh baihsae. Buet daengz gyaeuj lajroq dwg aenlae, gou sam yamq guh song yamq, laj din lumj caij dujfwj, lumj mbin nei daj sam laeuz roengz daengz ngeih laeuz. Daengz ngeih laeuz le, gou dingh aensim roengzdaeuj, ngeng rwz dingq. Gou dingqnyi sing gwnz laeuz yied daeuj yied gyawj, yied daeuj yied hung. Mbouj ndei, Mauz lauxsae hix byaij roengz ngeih laeuz daeuj lo!

Baenzlawz guh? Ndoj haeuj gizlawz bae? Gou sikhaek youh gaenjcieng lo, ganjvaiq laebdaeb deuz. Miz aen gyausiz he dou hai dwk, ndoj mbouj ndoj haeujbae? Mbouj ndaej mbouj ndaej, lumjbaenz mbouj ancienz. Mbiengjneix miz aen lae he, ganjvaiq roengzbae; mbiengjde miz gungx gok ndeu, ndonj haeujbae ndoj yaep ndeu gonq caiq gangj. Hoeng gou cungj roxnyinh gizlawz cungj mbouj ancienz, gizlawz cungj deng lauxsae yawjraen. Couh yienghneix, gou lumj duznou deng duzmeuz gyaep nei, gip ndaej goq mbouj ndaej ra roen, vueng- muengz buetdeuz.

Doeklaeng, gou ndoj youq gungx gok ndeu caj haujlai nanz, seiqhenz ciemhciemh mbouj miz sing, caemrwgrwg lo, sim gou hix ciemhciemh dingh lo. Seizneix gou sawqmwh miz di doeknaiq, gou naemj yaep ndeu, gag gangj gag naeuz: “Gou dwg guhmaz ha? Mauz lauxsae dwglau baenzlai ma? Raen lauxsae mbouj dwg wnggai cawjdoengh gvaqbae dongx ma? Ai! Gou seizlawz cij guh daengz mbeihung mbouj launyaenq ne?”

Gyoengq doengzhag, seizneix sou rox gou gangj aen goj duznou caeuq duzmeuz neix dwg byawz luba? Moix baez siengj daengz gienh saeh neix, gou cungj nyinhdaengz mbei swhgeij saedcaih daiq iq lo. Gou itdingh menhmenh gaij gij mbouj ndei neix bae, bienq ndaej mbeihung gagsaenq di.

(ngeih nienzgaep Lonz Yinzdanh)