Haenx dwg gienh saeh mwh iq ndeu. Miz ngoenz ndeu, daxdaiq cawx dangz QQ hawj gou caeuq nuengxbiuj boux bau, dwg song cungj feih mbouj doengz. Dou doxcaez baen gwn, gwn daengz doeklaeng, cingq- ngamj bau gou lw naed ndeu, gou cingq siengj gwn naedde, mboujliuh nuengxbiuj hix siengj gwn. Gou naemj: Mwngz gaenq gwn haujlai lo, gou ngamq gwn geij naed, naed neix wnggai hawj gou gwn lo. Yienghneix gou couh doiq nuengxbiuj naeuz: “Mwngz gwn baenzlai lo, naed neix gou gwn lo!” De sikhaek naeuz: “Gou hix siengj gwn.” “Mwngz gwn gij gou haujlai!” Gou buek de naeuz, de mbouj haengjheiq naeuz: “Mwngz hix gwn gij gou ne.” “Mwngz lai gwn gou cib geij naed, gou cij gwn mwngz geij naed, gou mbouj guenj, naed neix dwg gou!” Gou hozndat naeuz. Gou cingq siengj dawz dangz cuengq haeuj ndaw bak, nuengxbiuj daejnga’nga lo, itmienh daej itmienh hemq: “Gou aeu, gou aeu, gou hix aeu!” Daxdaiq doiq nuengxbiuj naeuz:“Hawj dahcej gwn, baez- laeng caiq cawx.”

De nyengh mbouj haengj, gou naeuz:“Yienghneix ba! Gou caeuq mwngz baen boux buenq baenzlawz yiengh, yienghneix couh goengbingz lo.” “Gou aeu naed ndeu, mbouj aeu buenq ndeu!” De hemq naeuz, yied daej yied haenq lo. Gou naengh youq henzde naemj yaep ndeu: Mbouj couh dwg naed dangz he ma, miz gijmaz ndei ceng lo? Gwn le youh mbouj ndaej bienqbaenz dahsien. Caiqgangj daxboh daxmeh gangj gvaq, guh vunz yaek rox doxnyiengh. Danghnaeuz de mbouj nyiengh, gou mbouj nyiengh, yienghneix nauh daengz seizlawz bae? Gou daeuj daengz henz ndang nuengxbiuj naeuz: “Ne! Naed dangz neix mwngz gwn ba!” De cam:“Caen ha?” Gou han: “Dangyienz, gwn ba!” Nuengx- biuj daej bienq riu han: “W!”

Mehdaiq hix angq dwk riu lo. Doxnyiengh, ndaej vaq gij ngaekngeu bae; doxnyiengh, ndaej hawj saedceij engq ndei. Sou naeuz deng lwi?

(haj nienzgaep Gauh Swjyinh)