Dingz dienh lo, ndaw rug sikhaek laepngau liux, gunghdiuz hix dingz hong lo, oem’am dangqmaz.

Gou lau lai, lumj naq liz gung nei buet daengz ndaw ding bae. “Bum——” sing ndeu, gyaeuj gou saeg hwnj bangxciengz bae, sikhaek couh roxnyinh gyaeujngunh dava liux.

“Caeklaiq cawj ndaej haeux- byaek lo!” Daxmeh daj ranzdajcawj laepngaungau byaij okdaeuj naeuz, “Raeuz couh diemj lab gwn caeuz ba!”

“Ndei, gou gaenq ra ndaej labcuk okdaeuj lo.” Goeng doq diemj lab doq naeuz. Diuzlab fat ok rongh henjnomj, hawj gou ndaej yawj cingcuj doenghyiengh dangqnaj.

Gwnz daiz diemj le sam diuz lab, ciuq rongh le gij haeuxbyaek daxmeh cawj haenx, yawj hwnjbae ndeiyawj raixcaix. Dou daengx ranz vunz humx naengh youq henz daiz, hainduj gwn caeuz. Hoeng dienheiq oem’am lai, youh mbouj miz saekdi rumz, gou ndat ndaej daengx ndang dumz hanh liux, lumj duzlingz roengz raemx nei! Gou gwn le gaemz haeux ndeu, geux hwnjdaeuj hohanghang, gij haeux- byaek bingzseiz ndeigwn ngamj bak seizneix bienq ndaej nanz gwn liux.

“Gou gwn mbouj roengz lo, ndat lai!” Gou cuengq vanjdawh roengz ienq naeuz.

Goeng yawjyawj dou, hozswnh dwk naeuz: “Roengz suenva daej laeuz bae aeuliengz ba, gyang ranz ndat lai. Byaekcaeuz cuengq youq gonq, gvaq yaep he iek le couh gwn ndaej roengz lo.”

Yienghneix, dou daengx ranz couh dwk dienhdoengz roengz laeuz bae lo.

Bonjlaiz aen suenva gvangqlangh ciengzseiz mbouj miz vunz haenx, seizneix vunz naengh rim liux, miz vunz gekleiz yiedsim daiq daeuj dienhdoengz doenghgij ndaej ciuq- rongh neix, cuengq hwnj giz sang bae ciuq rongh, dienhdoengz miz lai aen le, hix ciuq ndaej suenva ronghsagsag.

Suenva nauhyied raixcaix, caez- gya cungj comz naengh doxcaez gangjgoj gangjriu, sing riu sing gangjgoj goksasa. Dou hix ra aen dieg ndeu naengh roengzdaeuj gyahaeuj doihvunz.

Mbouj rox mwh lawz, miz dienh lo. Gyoengqvunz hainduj baenz gyoengq baenz raq ma ranz lo, suenva youh menhmenh dinghcub roengz- daeuj. Dou hix dauq ranz bae gwn caeuz. Baezneix, gwn caeuz gvaq le dou mbouj caiq dwg sikhaek yawj densi yawj soujgih, dauqfanj dwg humx naengh roengzdaeuj youh lienzdaemh gangjgoj gangjriu, angq dangqmaz.

Gou naemj, mboujdan baezneix dwg yienghneix, baezlaeng hix dwg ityiengh.

(bouxsij: Genj Yezyangz boux- hoiz: Ouh Caijfangh)