Sing yamqdin daxmeh vueng’vueng vatvat. Vueng’vueng vatvat, lumj raemxlae sawdikdik ndaw ga dah laj ndoibya de, lae gvaq benq raiqfeuz rin’gyaeq mizsaek bu baenz ndeu, mbaeumbengmbeng; mbaeumbengmbeng, youh angqfwngfwng.

Sing yamqdin daxmeh mbaeumbengmbeng. Mbaeu- mbengmbeng, lumj rumzbaihnamz gwnz ndoibya cisisi, daiq miz gij heiqhom dujva caeuq gij nditndat ronghsag de, raeujrubrub; raeujrubrub, youh homswdswd.

Baez haeujhaemh, daxmeh bae gwnz ndoibya guhhong dauqdaeuj, lij youq gizgyae, gou youq ndaw ranz couh ndaejnyi sing yamqdin daxmeh lo. Sing yamqdin daxmeh vueng’vueng vatvat, mbaeumbengmbeng .

Gou byaij ok bakdou bae, couh raen daxmeh byaij daeuj coh gou dahraix. Aennaj daxmeh riunyumnyum, ndeiyawj lumj dujva nei, unqswnh lumj ronghndwen nei.

Gou mbouj caengz nyi loeng sing yamqdin daxmeh gvaq.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）