“Lalala, okbae guhcaemz lo!” Lwg roeggyaeujmeuz ngamq siengj ok dou, cix angq lai raen yak, “bung” mbat ndeu, daemj deng gofaex; ciepdwk youh “bung” mbat ndeu, youh daemj deng diuzsaeu. Cingqngamj gyoengq doengzdoih iq ndeu lohgvaq bakdou ranz de, yawjraen de yiengh- neix, cungj nyaenx mbouj ndaej riuhaha, lwg roeggyaeujmeuz fouznaih ngaem gyaeuj roengzdaeuj.

Gvaq aen singhgiz he, youq ndaw gyoengq doenghduz iq, lwg roeg- gyaeujmeuz daenghhwnj “daeuzdiuz”, lij lai aen vamingz “lwgmoengjdoengj” ndeu. Lwg roeggyaeujmeuz raen gyoengqdoih cungj riu swhgeij, gag ninz youq ranz daejsebseb.

Doeklaeng miz ngoenz ndeu, lwg roeggyaeujmeuz nyaenx mbouj ndaej daej dwk lwnh gij saeh neix hawj daxmeh nyi. Daxmeh lwg roeg- gyaeujmeuz dingq le, naeuz lwg roeg- gyaeujmeuz:“Caen dwg lwghuk ha, raeuz roeggyaeujmeuz dwg gyang- haemh yawj ndaej raen, cungj dwg youq gyanghaemh guh saeh, baenzlawz ndaej youq gyanghaet yawj ndaej raen ne? Mwngz naeuz deng mbouj deng?” Lwg roeggyaeujmeuz sikhaek mingzbeg lo, lij dawz aen daegdiemj neix lwnh hawj daihgya:“Laxlawz gou youq banngoenz cungj miz di guh loek mbouj dwg aenvih gou huk, dwg aenvih dou roeggyaeujmeuz dwg doenghduz banhaemh yawj ndaej raen, ban- ngoenz yawj mbouj raen.”

Daj neix hwnj, couhsuenq lwg roeg- gyaeujmeuz yienz- naeuz gyanghaet lij guh gij saeh ndeiriu, hoeng daihgya hix caiq mbouj riu de lo.

( Vuz Yezcenh)