Miz aen “nonsuijbingz” yienghneix: Sang 1.7 mij, gvaengzhwet mij ndeu. Mwngz haengjdingh gamjdaengz geizheih—— baenzlawz miz aen nonj- suijbingz baenz hung? Gizsaed, “nonjsuijbingz” dwg aencoh dou an hawj Cwnz lauxsae maenghsaed haenx.

Vihmaz naeuz Cwnz lauxsae dwg “nonj- suijbingz”? Cawzle yienghsiengq de lumj aen nonjsuijbingz le, lij aenvih de rog caep ndaw raeuj.

Sien daeuj gangjgangj de “caep”. Mwh naj de mbouj riu gij yiengh yiemzsuk couh caepsisi, hawj vunz siengj hwnj aendamj nonjsuijbingz. Sing de gyauq hagseng baen sam gaep. Miz baez ndeu, miz boux doengzhag he nyex de huj lo, de cij yungh itgaep sing miqnaeuz boux doengzhag haenx, couh sawj daengx ban doengzhag hwk yaek dai bae. Sawqmwh, sing mbawfaex rog cueng yiengj “sasasa”, conghcueng ngauz “nyi’nyi nyetnyet”, dwglau lai lo.

Cwnz lauxsae doiq dou naeuz, hagseng de son gvaq haenx naeuz de “simdoeg”, heuh dou siujsim gaej hwnjdangq. Hainduj dou mbouj saenq. Cigdaengz miz ngoenz ndeu hwnj goq yijvwnz, Cwnz lauxsae heuh dou raiz geij cih saw. Mwh dou raiz de hix youq gwnz hwzbanj raiz geij cih de heuh dou raiz haenx, lij daegdaengq raiz loek. De ngamq raiz sat, gou sikhaek ndwn hwnjdaeuj naeuz: “Lauxsae, mwngz raiz loek lo.” De hob bak gig miz eiqsei riu dwk. Mwngz yawj de geijlai “simdoeg”, mbouj cingq lumj aen nonjsuijbingz biujmienh lauxsaed, ndaw dungx miz simgei ma?

“Nonjsuijbingz” biujmienh yienznaeuz “caep”, baihndaw cix gig “raeuj”. De youq gwnz dangz gingciengz haenh boux doengzhag dap vwndiz deng haenx. Mwh gyoengq doengzhag dap ndaej ndei, de couh aennaj raeujrub. Byawz danghnaeuz camgya doxdax ndaej ciengj, de couh fat ciengjbinj iq daeuj dajciengj. Daihgya ceiq angq dwg miz baez ndeu, ndaw ban doengzhag mbwk donzdij diuqcag doxdax aeundaej nienzgaep daih’it mingz le, Cwnz lauxsae gag ok cienz cingj daihgya gwnz gvaicanh angqhoh. Daihgya itmienh gwn nohgaeq daengx bak youzywd, itmienh bek aek naeuz binaj baujmaenh aen gvanginh neix.

Cwnz lauxsae dawz dou dangguh baengzyoux de, gingciengz caeuq dou gangj mbwn gangj deih. De gingciengz youq gwnz dangz caeuq dou gangj de gyaez guhmaz maij guhlawz, gangj ginglig dang lauxsae caeuq ginglig youq Sihcang, gangj saedceij mizyinx ndawranz…… Miz baez ndeu, rog gyausiz gingjbau yiengjviuviu, de sikhaek camhdingz hwnjdangz, faensik gij yienzaen gingjbau yiengj, faensik baenzlawz doenggvaq sing gingjbau dinj raez daeuj faenbied gij hamzeiq gingjbau. Dou daj ndawsim gyaez boux baengzyoux hung neix.

Vihliux hawj dou ndangcangq majhung, “nonjsuijbingz” bingzseiz guh haujlai hong. Vihliux mienxndaej hawj binghdoeg lah hawj boux doengz- hag ndangcangq, de daengq boux doengzhag deng bingh haenx bingh ndei 24 diemjcung le caiq dauq hagdangz; vihliux hawj daihgya boih lai di seiswz ciuhgeq, de caenndang cujciz hai bangaep seiswz daihhoih, moix boux doengzhag cungj ndaejik gig lai; vihliux gujli daihgya fatmingz cauh guh, de youq gwnz dangz faenyiengj gisuz conhli swhgeij, lij yaek caeuq dou beijbeij byawz ndaej ciengj lai……

Neix dwg aen “nonjsuijbingz” miz fapswd ndeu, rox dou maij gijmaz gyaez gijmaz, rox dou yaek aeu gijmaz, son vwnz mbouj lau baeg. Mwngz haengjdingh hozhaenz dou miz boux lauxsae lumj nonjsuijbingz yienghneix ba!

(seiq nienzgaep Vangz Gyahhanz)