Daxboh caeuq daxmeh youq henz dah dajsaeg, gou naengh youq ndaw batfaexlaux, daxboh aeu cag cug aenbatfaex.

Daxboh ha, gej diuz cag cug aenbatfaex de bae vei,

Daxmeh ha, hawj gou naengh aen ruziq neix, riengz raemxdah lae bae baihgyae vei!

Lae gvaq rangh gungxdah laeglaeg faex raemhrwdrwd de,

Lae gvaq henz raiq miz sing fwen yiengjsadsad de,

Ndonj gvaq dinbya heuswdswd de,

Ndonj gvaq song henz va hai rimdoh de.

Youq gwnz roen dingq duzroeg eufwen, yawj duzmbaj diuqfoux;

Youq gwnz roen miz ndit ronghsagsag, miz rumz cififi……

Daxboh ha, gej diuz cag cug aenbatfaex de bae vei!

Daxmeh ha, hawj lwg naengh aen ruziq neix, riengz raemxdah lae bae baihgyae vei!

Gou naengh aen ruziq neix, soh lae bae daengz ndaw haij.

Daxboh ha, mwngz mbouj dwg naeuz gvaq ha, ga dah neix lae bae daengz ndaw haij bw, henz haij miz sae’gyap gyaeundei dangqmaz gip cungj gip mbouj liux bw.

Daxmeh ha, daxmeh goj naeuz gvaq, ga dah neix lae bae daengz ndaw haij bw, ndaw haij miz nonnywjraemx gyaeundei dangqmaz bw.

Gou gip sae’gyap coq rim aenruz soengq hawj daxboh. Daxboh angqvauvau, dwg lwi, daxboh ha?

Gou gip nonnywjraemx coq rim aenruz soengq hawj daxmeh. Daxmeh gyaez dahraix, dwg lwi, daxmeh ha?