Aen ndwencieng bi 2020 caen daegbied, vunzlai vihliux wngqdoiq binghraq bwtndat, bouxboux cungj raek aengoemqbak, gou hix mbouj laehvaih.

Ngamq hainduj, gou raek aengoemqbak di ndeu cungj mbouj gvenq, cungj roxnyinh aenbak caeuq aenndaeng deng goemqdawz, diemheiq gig hoj.

Miz baez ndeu, gou raek aengoemqbak youq ndaw siujgih byaij. Mwhde, mbiengjde cienz daeuj sing doxndaq, gou geizheih dwk byaij gvaqbae. Laxlawz dwg miz boh’au ndeu mbouj raek aengoemqgak, de mbouj dingq bouxbaujanh gienq- laengz yaek haeuj ndaw siujgih bae, de leix deng heiq gaengq dwk naeuz: “Ndangdaej gou mbouj miz saek yiengh bingh, caiqgangj raeuz gizneix gig ancienz, mbouj miz bouxdengraq, vihmaz aeu raek aengoemqbak ne?” Boux boh’au baujanh naihsim gienq de, de lijdwg dingq mbouj haeuj rwz.

Gyoengqvunz youq henz yawj mbouj gvaq da, daihgya hix okdaeuj faenfaen gienq de. Miz vunz nai de naeuz:“Raek aengoemqbak dwg vih mwngz ndei.” Miz vunz hozndat naeuz: “Mwngz yienghneix haih daihgya bw, binghdoeg lij ndaej doenggvaq heiqyungzgyau cienzlah ne.” Lij miz vunz vahnaek cingzlaeg naeuz: “Mwngz baenzlawz ndaej baujcingq gij vunz byaij gwnz loh cungj dwg ndangcangq? Saeklaeuq mwngz deng cienzlah le hix deng cienzlah hawj vunz ndaw ranz mwngz bw.” Daihgya mwngz coenz ndeu gou coenz ndeu, boux boh’au neix cij roxdaengz swhgeij loek lo, naj nding dwk raek aengoemqbak lo. Daihgya hix cuengqsim sanq bae lo.

Yawj gyoengqvunz byaij bae gyae, gou youh caiq raek aengoemqbak ndei, ma ranz lo.

Ma daengz ranz, gou couh duet aengoemqbak roengz, yawj aengingq, aenvih aengoemqbak haed ndaej ndaet lai, gwnz naj at miz baenz diuz baenz diuz riz, hoeng siengj daengz swhgeij hag rox re bingh, couh riu lo. Seizde, gou roxnyinh swhgeij lumj guhsat gienh saehhung ndeu nei, yawjraen gofaex gova rog cueng maj ndaej engq mwn engq ndeiyawj lo.

Seizneix, gou raen gwnz cigunghgyauh、ndaw didez、ndaw cauhsi…… Daihgya cungj sibgvenq raek aengoemqbak, neix gaenq dwg cungj gingjsaek ndaw gwndaenj raeuz lo.

Gou saenq, saedceij raek aengoemqbak mbouj yienghneix raek roengzbae, aenvih raeuz roxriuj gingqlau sengmingh, engq rox baenzlawz dingj rumz doxhwnj, giengiengz、ndangcangq gwndaenj roengz- bae.

(Lij Veijhauz)