Gou aeu saenj mbokfaexndoek iq ndeu, yub raemxgenj, couh boq ndaej ok lailai aenbop ndeiyawj daeuj.

Lailai aenbop gyaeundei mbin youq gwnzmbwn.

Gou caen maqmuengh, aenbop sohsoh mbin bae daengz gwnzmbwn. Gyanghaemh, ndaundeiq okdaeuj le, hawj ndaundeiq ndoj haeuj ndaw bop bae. Ndaundeiq rim gwnz- mbwn, aen’aen ndaundeiq youq ndaw bop migmyag, gwnzmbwn gyanghaemh couh bienq ndaej gyaeundei dangqmaz bae.

Gvaqlaeng, gou lij aeu boq ok aen bop hunghung ndeu, rumz ci mbouj dek, daemj deng gofaex goj mbouj dek.

Gou naengh youq ndaw aen bop youh hung youh gyaeundei neix,

Mbin bae daengz gwnzmbwn sangsang bae,

Mbin gvaq byaibya sangngaungau de,

Mbin daengz giz gou mbouj caengz bae gvaq de,

Mbin daengz giz gou mbouj rox de.

Caj vunzlai yawjraen gou naengh youq ndaw aen bop hung de, gyaeundei lumj doenghgij bop miz ndaundeiq migmyag youq ndawde, itdingh baenzneix cam gou——

Boux lwgnyez naengh youq ndaw bop gyaeundei de ha,

Mwngz dwg daj giz gwnzmbwn miz ndaundeiq de daeuj dwg lwi?

Gwnzmbwn gyanghaemh bienq ndaej gyaeundei baenzneix,

Dwg mwngz coq ndaundeiq haeuj ndaw bop gyaeundei de bae dwg lwi?

Langhnaeuz mbouj dwg daj gwnzmbwn miz ndaundeiq de daeuj,

Mwngz youh daj gizlawz daeuj ne?

Mwngz lwnh gou vei, ranz mwngz youq gizlawz?

Lwnh hawj dou dingq ba, coh mwngz heuh gijmaz?

Gou angqfwngfwng! Aenvih vunzlai cungj gyaez gwnzmbwn gyanghaemh bienq ndaej gyaeundei gvaq doenghbaez. Hoeng, gou mbouj lwnh coh gou hawj sou rox bw, hix mbouj lwnh gij saeh gou boq bop coux ndaundeiq de bw. Guh di saeh hawj vunzlai gyaez ndeu, vihmaz hawj vunzlai rox dwg gou guh ne? Vihmaz hawj vunzlai rox coh gou ne? Gou yienghneix han ndwi——

Gou mbouj dwg daj gwnzmbwn sangsang de daeuj,

Gou hix dwg boux lwgnyez bingzciengz ndeu,

Gou daj baih ndoibya mbouj gyawj mbouj gyae de daeuj,

Ranz gou youq gwnz ndoibya iqiq ndeu bw.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）