Cuengqhag ma ranz, gou caeuq daxmeh itmienh byaij itmienh gangj gij saeh mizyinx ndaw hagdangz, angq lai lo. Sawqmwh, gou yawjraen gwnz dieg miz aen bingzyinjliu ndeu, de youq diuz lohvunzbyaij seuqcingh neix baenzneix coegda. Gig cingcuj, neix dwg byawz gwn yinjliu liux le swnhfwngz vut go. Simcingz gou sikhaek mbouj sangj lo. Gou gag gangj gag naeuz: “Neix dwg byawz ha, caen mbouj gangj veiswngh, dawz nyapnyaj vut gwnz dieg guhmaz ha? Henzde couhdwg doengjnyapnyaj, baenzlawz mbouj vut haeuj gizde bae ne?” Ndawsim gou gig mauzdun——gip hwnjdaeuj ba, gou miz di lau uq; mbouj gip ba, sim gou couh lumj deng maz saek youq nei. Cingq youq mwh gou mbouj rox baenzlawz guh, daxmeh dajciengj le gou. Dingq vah daxmeh le, gou mbouj lawq saek di gip aen bingzyinjliu gwnz dieg hwnj, cuengq haeuj ndaw doengjnyapnyaj bae. Diuzloh bienq seuq lo, sim gou hix bienq ndaej soengswt lo. Ciepdwk, gou caeuq daxmeh doxcaez dawz gij ceij gvangjgau nem youq gwnz lanzganj haenx baez di baez di sik roengzdaeuj. Gou dawz fagmid iq ndaw daehsaw okdaeuj, gvet gij ceij fwngz sik mbouj bae haenx seuq bae. Yawj diuz lohvunzbyaij caeuq lanzganj seuqsak de, gou raen va engq gyaeu lo, nywj engq heu lo, gofaex hix ngaek gyaeuj coh dou docih dou.

(sam nienzgaep Lij Swjyenh)