Dangz goq ceiq doeklaeng, lauxsae lij caengz daengz gyausiz, ndaw ban luenhyauyau, doengzhag lwgsai ceiq guengz, daihsing youh swenj youh hemq.

Gou ndawsim ngeix, ngoenzneix lauxsae vih- maz caengz daeuj ne? Ndaw ban yienghneix luenh baenzlawz banh? Banhcangj sing hung hemq dwk: “Caemdingh di.” Gou laihnaeuz daihgya rox caem roengzdaeuj, siengj mbouj daengz bouxboux cungj dangq rwznuk mbouj dingqnyi. Seizhaenx, lauxsae yamq hung gipgip muengzmuengz byaij haeuj gyausiz daeuj, ndaw ban sikhaek caem ndaej fagcim doek daengz gwnz dieg cungj dingq ndaej nyi nei.

Lauxsae byaij daengz gwnz gangjdaiz, muengh- muengh gyoengq doengzhag, gig ndatheiq dwk diemj mingzcoh Lij Cinfungh: “Lij Cinfungh, mwngz daeuj gangjgangj, danghnaeuz lauxsae mbouj daeuj, ndaw ban ndaej bienqbaenz yienghlawz?” Lij Cinfungh gip dwk ndwn hwnjdaeuj naeuz:“Lumj gwnzhaw gai byaek yienghhaenx cauz.”Ciepdwk lauxsae youh diemj mingzcoh geij boux doengzhag, gyoengqde cungj gangj ndaw ban itcig cauzhoho.

Lauxsae dingq le hojsik naeuz: “Danghnaeuz lauxsae mbouj daeuj gyausiz, gyoengq doengzhag couh cauz mbouj daengx, raeuz roek (2) ban doengzhag couh dwg buenz sa sanq ndeu, couh deng doengzhag ban’wnq naeuz roek (2) ban mbouj miz cujciz mbouj miz gijliz. Gou haxbaenh youq ndaw bangunghsiz dingqnyi sou sing swenj hunggok cauzhuhu, gou youq bangunghsiz cungj roxnyinh najmong liux. Sou siengj cauz couh cauz ba, gou mbouj hwnjdangz lo.” Lauxsae ndatheiq dwk byaij ok gyausiz bae.

Dou dangseiz cungj ngaez lo, mbouj miz vunz gamj gangj saek coenz vah, ndaw gyausiz caemdingh ndaej lienz daihgya diemheiq cungj dingq ndaej nyi. Doeklaeng, daihgya cungj dawz saw caeuq bonjlienhguh okdaeuj, gag yawjsaw lienhguh. Gou naemj, daihgya wnggai roxnyinh swhgeij guh loek luba.

Gij gijliz geng dwg gij baujcwng gwzming ndaej hingz. Doengzyiengh gijliz hix dwg vwnzmingz aen ban ndeu, dwg baujcwng aen cizdij ndaej cinbu. Raeuz wnggai gagrox souj gijliz. Dangz goq neix hawj dou hit caen nanzlumz ha!

(lauxsae son’gyauq:Vangz Gveiyangh)