Ngoenzneix dwg ciet ngux nyied co’ngux, ranz gou gietdingh suek faengx daeuj coux aen ciet neix.

Hainduj suek faengx lo! Yahdaiq gaenq dawz bat haeuxcid bwh ndei haenx cuengq gwnz daiz, daxboh riuj doengj rongfaengx heuyauyau he daengz baihnaj dou. Gou caj mbouj gib song fwngz iet roengz doengj bae aeu song mbaw rong, gienj baenz aenlaeuh. Dang gou dawz haeuxcid coq haeujbae seiz, haeuxcid gingqyienz daj baihlaj roh okdaeuj lo. Gou ganjgip aeu rong daeuj suek aencongh, dinfwngz luenh caez dawz haeuxcid doek gwnz daiz haenx dauq coq haeujbae. Gaenlaeng, gou dawz aen hoengzcauj he oet haeuj ndaw haeuxcid bae, caiq aeu aen gak song mbaw rong doxdab euj coh baihgvaz, doeklaeng aeu cag daeuj cug, lij heux sam seiq gien, aen haeuxfaengx he couh suek baenz lo.

Mwh gou suek aen faengx he, yahdaiq gaenq suek ndaej haj aen, lij suek ndaej gig gyaqciq. Gou doeksaet dwk yawj yahdaiq, yahdaiq riunyumnyum lwnh gou: “Gienj mbawrong itdingh aeu caengzcaengz suek ndaet, neix dwg bouh youqgaenj re haeux roh okdaeuj. Lij miz, haeuxcid mbouj ndaej coq rim lai, mboujnex cug cag seiz haeux heih roh okdaeuj.”

Yawjdaeuj, suek faengx miz haujlai ndei banhfap bw!

(ngeih nienzgaep Huz Gingzvwnz)