Miz baez ndeu, gou yawjraen hagdangz senhconzlanz miz banjbauq gimqdoeg, gou siengj yawj dauqdaej gwnzde sij gijmaz, mbouj yawj mbouj rox, yawj le ndang cungj saenz caez.

Gij banjbauq saedcaih hawj vunz ndang saenz sim diuqbobbob, gwnzde sij miz gak cungj saehlaeh fanjmienh gwndoeg, lumj miz boux hagseng ndeu cingq doeg gauhcungh it nienzgaep, aenvih daiq saenq doengzhag, ndigah mbouj miz aensim fuengz vunz, doengzhag hawj de naed dangz ndeu——huqdoeg, de mbouj hozngeiz saek di, couh gwn roengzbae. Doeklaeng hwnjyinx lo, dingz mbouj roengzdaeuj, aenndang de byombyangbyang, lix mboujyawx dai bae. Miz boux mehmbwk cungnienz bizbwd ndeu, aenvih biz lai, nyapnyuk raixcaix. De dingq gangj huqdoeg ndaej gemjbiz, de mbouj ngeizvaeg saek di, couh cawx le huqdoeg, ganjgip gwn roengzbae, doeklaeng aenndang de yienznaeuz byom roengzdaeuj lo, hoeng mwh yinxdoeg fatcak, hojyouq yaek dai, ngaiz hix gwn mbouj roengz, daengxngoenz cungj siengj gwn huqdoeg, siengj gaij hix gaij mbouj ndaej, ndangcangq mbouj miz lo, gyadaej mbouj miz lo, gya hix mbouj baenz gya lo. Yawj daengz gij gojgaeq camj dwk mbouj nyaenx yawj neix, hawj vunz dungxmbouq ndangsaenz, bwn gwnz ndang cungj daengj- saengsaeng bae, huqdoeg doiq vunz ndangcangq sienghaih caen hung ha!

Youq gwnz banhoih cawjdaez “ndiepgyaez sengmingh, lizgyae huqdoeg”, lauxsae hawj dou gangj aen gojgaeq engq caensaed youh siliengz ndeu: Gaenhlaenz mbanj miz boux hauxseng ndangcangq ndeu, baez ndeu de vihliux angqhoh baengzyoux gvaq ngoenzseng, haeuj ndaw “KTV” bae, baengzyoux de ndenq naed “yauzdouzvanz” he hawj de, de laihnaeuz dwg dangz, couh sikhaek gwn roengzbae, hoeng baez gwn roengz dungx le, gij yw couh fatcak lo, aen’gyaeuj de ngauz mbouj dingz. Doek- laeng de doiq “yauzdouz- vanz” hwnjyinx lo, de dawz ngaenz gwnz ndang cungj bae cawx “yauzdouzvanz”， doek- laeng bienqbaenz gwn mbahau lo. Ngaenz yungh liux le, couh cam daxbuz aeu，daxbuz laihnaeuz dwg yungh daeuj gwndaenj, couh hawj ngaenz hawj de. Hoeng de ngoenzngoenz cam daxbuz aeu ngaenz，ngoenzngoenz haeujok “KTV”、 “ciujbah”. Daxbuz roxnyinh mbouj cingqciengz, naeuz de haujlai baez，de cungj mbouj dingq，couh mbouj hawj ngaenz hawj de. De doegyinx fatcak, nyaenx mbouj ndaej, yawjraen daxbuz cingq saeg buh, couh gaemdawz fag caxbyaek, bag dai daxbuz bae, lij cienzbouh caeg aeu ngaenz ndaw ranz, deuz ok rog bae lo. Dangyienz de doeklaeng lijdwg deng faplwd ceihfad lo. Dingq lauxsae gangj sat aen gojgaeq neix le, byoem gwnz gyaeuj gou daengjsubsub, genga cungj hwnj naenggaeq, huqdoeg haih vunz caen doeg ha!

Huqdoeg dwg gij laex duzfangzdai, mwngz baez ciep aeu, couh dai youq ndaw fwngz duzfangzdai, duzfangzdai gig fouzcingz. Vihliux sevei an’onj doxhuz, vihliux ranzvunz bingzan vuenyungz, cingj geiqmaenh gawq vah neix: Ndiepgyaez sengmingh, lizgyae huqdoeg.

(bouxlauxsae son’gyauq:Vangz Gveiyangh/黄桂香)