Gou caeuq daxmeh bae suenyw gwnz bya guhcaemz, yawjraen henz roen miz go faex ndeu dawzmak baenz nyoemq baenz nyoemq, lwg- mak de caeuq maknganx doxlumj lai.

Maknganx mbouj ndei- yawj lumj de, mbouj henj- rwkrwk lumj de, mbouj ronghcingx lumj de. Mak- nganx goj mbouj homfwtfwt lumj de, mbouj vanyupyup lumj de.

Gou laihnaeuz cungj mak neix baenzgwn gvaq mak- nganx, couh mbaet aen ndeu coq ndaw bak nyaij, aiya, youh haemz youh saep youh niu, linx cungj maz liux.

Daxmeh naeuz, cungj mak neix heuhguh maksaeg, gwn mbouj ndaej go.

Geizheiq lai! Maksaeg haemz baenzneix saep baenzneix niu baenzneix, gwn le linx lij maz dem, vihmaz ndeiyawj gvaq maknganx bae ne? Vihmaz nyouq de youh homvan gvaq gij maknganx vanyatyat de ne? Vihmaz mbouj lauxlaux saedsaed yakyawj di ne, hawj vunz raen le couh haemz de ne? Vihmaz gyaeundei baenzneix, dwggyaez baenzneix, hawj vunz gyaezmaij ne?

Maksaeg rox yaeuh vunz lai! Dwggo! Denggo! Doenghgij vunzrwix yaeuh vunz caeuq duznyaenma vaddaeuz ndaw gojgaeq daxboh lwnh de, goj dwg cangguh yiengh dwggyaez, gangj vah ndeidingq, mbouj dwg ma? O! Gou rox lo: Vunz, miz bouxguhyaeuh yaeuh vunz; nyaenma, goj rox yaeuh vunz; lwgmak, goj miz lwgmak yaeuh vunz. Maksaeg couhdwg mak yaeuh vunz, dwg lwgmak ndawde aen mak guhyaeuh go!

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh/卢奋长 hoiz）