Daihcaet Gwn Duzngwz

Gyanghwnz ngoenzde, mbouj, laebdaeb cibgeij aen gyanghwnz, gou cungj deng haujlai duzngwz hung gyaep haeb, gwnznamh miz duzngwz rim caez, daemh mbat yamq ndeu roengzbae, unqnemnem caemhcaiq raeuzradrad, ngaemgyaeuj baez yawj, youh dwg duzngwz, moix haemh cungj deng duzngwz hwk dwk daengx ndang lengxhanh. Caeklaiq baez bungz yaek saetmingh seiz, vangz- ngwz aj bak lumj aenlaep baenzneix hung haeb coh gyaeuj gou seiz, gou swenj sing ndeu, ndiu lo, an’onj ninz youq gwnz congz.

Aen loq doxdoengz, lai baez le, gou couh gvenq lo, hix mbouj daih dawz haeujsim lo. Caenhguenj youq ndaw loq deng duzngwz hung gyaep ndaej dauqcawq buetdeuz, hoeng ndawsim gou gyajgyumq rox dwg youq ndaw fangzhwnz, gaej lau, doeklaeng yaek dai seiz, swenj baez he, ndiu gvaqdaeuj, raen ninz youq gwnz congz, duzngwz caiq hung hix mbouj rox baenzlawz sieng gou, ndigah, laebdaeb cibgeij hwnz fangzhwnz raen duzngwz le, gou couh menhmenh lumz lo.

Liuh mbouj daengz ngoenzneix youh yawjraen Aulungzgveiz gaeb duzngwz, yienznaeuz duzngwz neix beij duzngwz mbatde youq mohrin singq Linz lij iq, hoeng gij yiengh ca mbouj geijlai, aen ndang gutgungq nodning hix doxdoengz caez, yawjraen de, gou youh gag dauqcungz ngeix hwnj le baezde youq ndaw fangzhwnz deng duzngwz hwk、 gyaep, baihlaeng gou youh lumj miz raq rumzliengz bongj gvaq.

“Duzngwz neix caen biz.” Aulungzgveiz nyaenxnyaenx ndang duzngwz, gig habhoz naeuz, gou hix mbouj gamj han coenz he.

Seizneix, de gaenq aeu benq- bohliz gvej gij hoz duzngwz gvaengx he lo, gamz benqbohliz youq bak, song fwngz nyaenx giz hoz deng gvej duzngwz, menhmenh bok naeng duzngwz roengzdaeuj, daengx aen fanj okdaeuj, couh lumj seizdoeng gou duet mad nei. Gij noh daj giz hoz bok okdaeuj hausaksak, lae ok di lwed, duzngwz haenx in ndaej buekmingh niuj, diuz rieng mboujduenh bongx geuj ndang Aulungzgveiz, yawj ndaej gou bak aj da daengx, aensim diuqbaegbaeg mbouj daengx.

Bok naeng daengz dungx de seiz, gij sing bok naeng miz di lumj gou bok naeng lwgbug, caengz naeng ngwz miz di na, caeuq noh nem dwk, seizneix nyaenx nyengh bok roengzdaeuj, caen miz di doegsieb. Yienznaeuz bingz- ciengz gou youh haemz youh lau duzngwz, hoeng yawjraen cungj cingz- gingj neix, hix vih duzngwz neix siengsim.(caengz sat)