Banh daegsaek hagdangz,

Mbouj gangj ok lwedhanh;

Ciuq cwngcwz bae banh,

Ndei fanh daih lwglan.

Banh ndei hagdangz raeuz,

Caezgya aeu doengzsim;

Gangj hengz yaek vwnzmingz,

Caencingz bae guh saeh.

Gauj hagdangz gensez,

Gaej caenh deq vunz bang;

Gij saeh lumj bya sang,

Wngdang roengzrengz benz.

Seiqvunz aeu sienhsoh,

Niemh bohmeh aencingz;

Guh saeh aeu caensim,

Raen gim cungj mbouj caeg.

Guh vunz mbouj doegyak,

Haibak gaej ndaq vunz;

Danghnaeuz dwg simbwn,

Aenmbwn cungj mbouj nyiuz.

Lauxsae caen sinhoj,

Son raeuz rox dauhleix;

Raeuz yaek doegsaw ndei,

Gyo’mbaiq geiq ndawsim.

Bohmeh aencingz naek,

Lij laeg gvaq aenhaij;

Mizseiz de baeg naiq,

Raeuz lai guh hongranz.