Youq gwnzbiengz, miz yiengh vunz ndeu cungj nyinhnaeuz bonjfaenh yienghyiengh ndei, bonjfaenh yienghyiengh ak. Yiengh vunz neix guh saeh couh cungj lau vunz mbouj rox, gag nyinhnaeuz swhgeij guh saeh couh itdingh aeu vunz rox, maqmuengh bouxboux cungj naeuz de baenz, bouxboux cungj naeuz de ak. Yiengh vunz neix yawj mbouj ndaej vunz ak gvaq de, yawj mbouj ndaej vunz ciemq de.

Doeg le bi 2020 ndwen 6 ngoenz 17《Gvangjsih Minzcuz Bau》（Banj Sawcuengh） banj daihngeih bien faenzcieng 《Dienhvah Geizgvaiq》le, gou gag naemj daengz aen dauhleix ndeu, aen dauhleix de couhdwg: Son raeuz baenzlawz guh vunz.

Ndaw faenzcieng sij daengz song aen “dienhvah geizgvaiq” hawj bouxsij mbouj rox baenzlawz guh cij ndei, gij saeh yienghneix bouxsij mbouj miz banhfap bae guh, hix guh mbouj ndaej, mbouj dwg dan bouxsij guh mbouj ndaej, bouxlawz hix guh mbouj ndaej, bouxlawz hix mbouj miz banhfap bae guh. Gaijgez yiengh saeh neix, cij miz boux dwk dienhvah de gag guh, couhdwg aenvih miz boux dwk dienhvah yiengh vunz neix cij miz yiengh saeh neix okdaeuj.

Aen dienhvah daih’it: Boux vunzcaiz bouxcoz mizmingz ndeu “yaek sinhcingj buqlaeh dang fu gyausou, baihgwnz saemj gvaq caizliuh de le, nyinhnaeuz diuzgen de caengz hab geijlai, couh mbouj baecinj, de laih dwg baihgwnz hozgenz de miz dungxcaiz lai, daegdaengq aeu gaemh’at de” . De siengj heuh bause youq gwnz bauqceij daengh gij saeh neix okdaeuj.

Youq neix raeuz mbouj gangj bause miz mbouj miz aen gienz neix, raeuz rox bause dwg aen conghcueng hawj vunz roxyiuj sienh yak, yawjraen ndei rwix. Gienh saeh bouxcoz mizmingz neix, guh ndaej deng mbouj deng, gag miz aen bumwnz he bae guenj, gag miz gyoengq bingzveij daeuj bingznaeuz. De baez dingq daengz bouxsij naeuz guenj mbouj ndaej, couh “hozgaek lo”. Doeklaeng “boux lauxsae coz okmingz neix seizneix gaenq mbouj ndaej dingqgangj lo”. Vihmaz ni? “Aeu vah raeuz daeuj gangj, couhdwg boux vunz neix mbouj rox guh vunz”.

Aen dienhvah daihngeih: Goenglaux bouxsij ndeu naemj youq ndaw bause “daj ndaem cawz yak”, aenvih “duenh seizgan neix faenzcieng de yungh noix di, de nyinhnaeuz dwg bouxbien luenh yungh gienz, dan yungh faenzcieng vunzsug, mbouj yungh faenzcieng de”.

Yawj daengz gizneix gou raen doeksaet youh raen ndeiriu, bause yungh mbouj yungh faenzcieng roxnaeuz noix yungh gij faenzcieng raeuz, raeuz aeu ndeindei bae naemj dwg maz yienzaen, lumj- baenz raeuz sij ndaej ndei mbouj ndei, sij ndaej hab mbouj hab aen seiqneix, lumjbaenz faenz- cieng daiqlai caengz yungh daengz gij faenzcieng raeuz, lumjbaenz gaenq baiz banj le yaek daengh okdaeuj daengjdaengj. Bause yungh mbouj yungh gij faenzcieng raeuz, aeu ginggvaq bouxbien、boux cungjbien daengj lai gap saemjdingh cij ndaej gietdingh hab mbouj hab yungh、seizlawz cij hab yungh, gauq bause mbouj yungh gij faenzcieng swhgeij, couh lumj gaemh daeglwg vunz aeu dahlwg raeuz bae guh bawx nei, swhgeij gag longh ciemh swhgeij, swhgeij gag sik naj swhgeij.

Caiq gangj, dawz bause mbouj yungh roxnaeuz noix yungh faenzcieng swhgeij gienh saeh neix caeuq “daj ndaem cawz yak” rangh hwnjdaeuj, vihmaz couh mbouj naemjnaemj swhgeij couh- dwg vunz ndaem、vunz yak ni? Bause miz gienz yungh mbouj yungh gij faenzcieng raeuz, raeuz miz maz gienz gaemh bause itdingh aeu yungh gij faenzcieng raeuz? Bouxsij aeu gienh saeh de sij 10 bien fat okbae cij ndaej daengh 3 bien, daeuj lwnh hawj raeuz: Raeuz mbouj ndaej gaemh bause yungh gij faenzcieng raeuz.

Gou gag naemj, gij goj ndaw faenzcieng neix mbouj rox dwg bouxsij gag naemj okdaeuj roxnaeuz caen miz gij saeh neix, gyonj daeuj gangj bouxsij dwg aeu song aen dienhvah geizgvaiq neix daeuj son raeuz guh vunz aeu rox dag ndang caiz buh, aeu rox rau dungx gwn haeux, mbouj ndaej fouz saeh ra saeh, mbouj ndaej cij naemj daengz swhgeij. Ciuq vah bouxsij naeuz couhdwg——

“Bouxvunz mbouj rox guh vunz, caeuq vunz gangjvah cungj maij dingjbak, baenzlawz caeuq vunz doxyouq, baenzlawz caeuq doengzsaeh guh saeh cungj mbouj rox, cungj vunz neix baenzlawz guh ndaej bae dem?”