Doengzdaiz moq gou —— Lij Liz, byoem luenh lumj rongzgaeq nei, sing hunggok, caeuq vunz gangj vah cungj lumjbaenz hemq nei, ciengz hawj lauxsae laj laeuz buet hwnjdaeuj gauq. Gou doiq de yinsieng soqlaiz mbouj ndei. Mboujgvaq, gienh saeh haenx fatseng le, gou doiq de yawjfap gaijbienq lo.

Ngoenz haenx, lwnz daengz ban gou baet cauhcangz. Lauxsae byaij gvaqdaeuj, cam byawz bae baet diuz mieng uq mbiengj haenx. Gyoengq doengzhag cungj cang gij yiengh cingqcaih ciensim guh hong, ngaem gyaeuj mbouj guhsing. Mwhde, Lij Liz sing hung naeuz: “Lauxsae, gou bae!”

Ndaejnyi gij vah de, gyoengq doengz- hag cungj cuengq gaemz heiq he. Hoeng, lauxsae doiq gou naeuz:“Bungz Yez, mwngz bae bang de.”

Gou? Caeuq de doxcaez bae baet mieng uq? Gou cengqgengz doiq lauxsae riu naeuz: “Ndei ha.” Gou dwg hagseng ndei ndaw ban, baenzlawz gamj mbouj dingq vah lauxsae? Gou cijndei dawz fagnep raez, byaij bae coh diuz mieng haeu haenx.

Lij Liz caeux couh gaenq diuq roengz ndaw mieng bae, hainduj cingleix lo. Heiqhaeu coemj gvaq naj daeuj, gou ganjgip goemq ndaeng, nyaeuq aen najbyak, ndawsim gig dwgcaengz caeuq yieplau, caen mbouj rox baenzlawz diuq roengzbae baet. Mwhde, Lij Liz ngiengx gyaeuj hwnj, riu dwk doiq gou naeuz: “Mbouj miz maz law, gou boux dog baet couh ndaej lo, mwngz bae baet gizwnq ba.”

Gou ndwn youq gwnz mieng yawj de, gwnz naj de raemxhanh yied daeuj yied lai, geubuh de deng hanh iemq dumz lo. De mbouj dawz haeujsim yungh fwngz uetuet hanh, yienzhaeuh sugsed dawz nyapnyaj nep haeuj ndaw doengj, youh vatvet buet bae dauj nyapnyaj.

Gou gag laihnaeuz gou dwg hagseng ndei ndaw ban, hoeng youq mwh youqgaenj, gou cix doiqlaeng lo. Seizneix, yawjraen aenndang doengzdaiz gou gaenxgyaek guh hong haenx, gou najmong dwk ngaem gyaeuj roengzdaeuj lo.

Boux doengzdaiz moq neix, caen hawj gou boiqfug ha!

(seiq nienzgaep Bungz Yez)