Ngoenzneix, gou caeuq daxboh bae aeu fwnz. Youq gwnz bya gyae’gyanggyang de miz benq ndoengfaex ndeu, gogo faex cungj hai va hausaksak. Gou caengz ndaej raen gvaq va hau lai baenzneix hung baenzneix.

Boh naeuz, neix dwg vacazyouz go.

Vacazyouz, goj dwg vacaz lwi? Caeuq doenghgij cazbya nding gyoengq boh’au gyoengq mehliuz gyaez ndaem youq ndaw bat de, cungj doengzyiengh dwg vacaz lwi?

Dwg go, boh naeuz, vacazyouz goj dwg vacaz go, hoeng, mbouj miz saek boux vunz ndaem vacazyouz youq ndaw bat aeu daeuj yawjngonz bw. De maj youq gwnz bya, laeglemx hai va, laeglemx loenq, goj laeglemx baenz aen, baenz aen laux lumj makdoengj bae. Gyoengq bouxguhnaz mbaet mak de ma caqyouz, youz de baenz yungh lailai.

Vacazyouz goj dwg vacaz, vihmaz vunzlai cungj haenh gyaez doenghgij cazbya nding dan hai va mbouj baenz aenmak de ne? Vih maz vunzlai mbouj haenh gyaez vacazyouz baenz aenmak neix ne?

Vacazyouz hausaksak neix goj caemh dwg dujva gyaeundei raixcaix bw.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh(Luz Fwncangj)/卢奋长 hoiz）