“It、ngeih、sam、seiq……”Ha, gou dauqdaej hag rox dwkyienq lo.

Daj it nienzgaep hainduj, gou dwkyienq couh itcig mbouj ndei, ciengzseiz lienz dwk song aen cungj dwk mbouj ndaej, dwk daengz sam aen couh suenq ak lai lo. Gou ciengz vih neix simnyap.

Miz baez ndeu hwnj dangzdijyuz, lauxsae fat hawj dou moix vunz aen yienq ndeu lienh dwk. Gou yawjraen gyoengqvunz dwk ndaej aenyienq mbin- fwfw, simgaenj dangqmaz, aenvih gou gaenbonj mbouj rox dwk. Ai, cengqgengz lienhlienh gonq ba, gou ngamq sawq dik baez ndeu, aenyienq couh deng mbin ok gyae’gyae bae lo. Gou doq bae gip doq naemj:“Gou itdingh aeu dwk ndei!”

Cuengqhag ma ranz le, gou sikhaek ra yienq okdaeuj lienh, daxmeh youq henz sonyinx. Gou gveng aenyienq doxhwnj, youh baenzlaenz iet din bae ciep aenyienq, aen daih’it lij suenq caijsoq ndei, hoeng gig vaiq couh doek roengz deih lo. Daxmeh bwnda nyaeuq dwk naeuz:“Mwngz dik baez ndeu le, couh cuengq din roengz daeuj ciep baez daihngeih.” Gangj sat de couh dwk hawj gou yawj, aenyienq youq gwnz din de caen dingqgangj, hawj gou hozhaenz liux, gou seizlawz cij lienh ndaej yienghneix ha? Gou youh lienzcienz lienh, hoeng cungj dwg dik sat baez ndeu cuengq din roengz, caengz caj gou iet din, aenyienq youh doek deih lo. Aenvih deihdeih gungq hwet gip yienq, mbouj geij nanz gou couh hwet naiq laeng in, hanh conh buh dumz lo. Hoeng aenyienq lumj cienmonz caeuq gou doxdingj nei, cungj dwg beij din gou doek deih gonq, gou huj lo, vut aenyienq okbae. Daxmeh gipmuengz naeuz:“Hag dwkyienq mbouj gojnaengz it seiz buenq seiz couh hag ndaej baenz, mwngz aeu ngoenzngoenz dingj lienh cij ndaej, dajdingh cinbu didi ndeu, mwngz hix dwg dwk ndaej yied daeuj yied ndei.”Gou dingq le, daj gyangfwngz daxmeh ciep gvaq aenyienq, sup gaemz heiq laeglaeg ndeu, bau aenyienq hwnj, vaiq hwnj din bae ciep, gingqyienz laebdaeb ciep ndaej song baez, gou sim’angq dangqmaz, doeklaeng youq daxmeh gujli lajde, gou gig yungzheih couh lienz dik ndaej song baez lo, gou hix lienh ndaej engq hwnjyinx lo.

Couh yienghneix ngoenzngoenz lienh, gou lij camgya le doih dwkyienq hagdangz, miz lauxsae cienmonz son, gou dwk ndaej yied daeuj yied ndei lo, doeklaeng gou daibyauj hagdangz camgya doxdax dwkyienq daengx si, ndaej daih’it mingz ne.

Mboujdan dwg hag dwkyienq, guh gijmaz saeh cungj dwg yienghneix, cijaeu mwngz nyinhcaen bae guh, haengj roengzrengz couh itdingh guh ndaej baenz. Miz di saeh yawj hwnjdaeuj hojnanz lai, hoeng cijaeu mwngz nyienh bae sawq, nyienh bae guh, mbouj miz gijmaz guh mbouj baenz.

Gyoengq boux doengzhag, geiq maenh coenz vah neix: Gwnz biengz mbouj saehnanz, cij lau vunz mizsim! Raeuz doengzcaez roengzrengz ba.

(Yangz Cinyuz sij Ouh Caijfangh hoiz)