De diemheiq hemq, gou daengx roengzdaeuj baez yawj, gij doxgaiq ndaw fwngz de vangh haenx dwg faexgyaengh? Mingzmingz dwg duz ngwz hung haenx! Ah Gunh gyoengqde beij gou buet ndaej engq vaiq, caemhcaiq lumj geij gep mbawfaex roz deng rumzhaenq bongj nei, dauqcawq mbinfubfub, seizneix ndaejnyi gij sing hemq Aulungzgveiz, cungj dingz din lo, saeknaj haunyo muenghmuengh gou, youh muengh coh de.

“Duz ngwz hung deng gou gaeb ndaej lo! Sou vaiqdi daeuj bangfwngz ha!”

Byawz gamj gvaqbae bangfwngz ne? Dub dai gou gou hix mbouj gamj bae ha.

Diuz rieng duzngwz hung deng geuj youq ndaw fwngz Aulungzgveiz, aen ndang deng saenq ndaej soh- sedsed, lij nodgwdgwd, aen gyaeuj de daegbied dwglau, aen bak aj ndaej gig hung, iet ok linxgaeq hoengzmaeq, fat ok gij sing yiengjhuhu, Aulungz- gveiz mbouj gamj cuengq de roengz- daeuj, itcig mbouj dingz saenq vad de, byawz gamj byaij gyawj bae bangfwngz ne?

Gyoengqdou sanq youq seiqhenz, ndwn ndaej gig gyae, lau fwngz Aulungzgveiz baez soeng, dad duz ngwz hung daengz gwnz ndang gaeq bae!

Gahengh gou gwq saenzdwddwd, gag cengqmbei, byaij song yamq iq coh naj, yaek beij gyoengqde mbei- hung di, hemq:“Aulungzgveiz, vaiq dad aen gyaeuj de daengz rinbanj bae, dad aen gyaeuj de dek bae ha!

“Mbouj ndaej gangjriu!”

“Gou yaek gaeb duz lix, duz lix cij dijcienz!” De doq vangh duz ngwz hung, doq coi gou:“Vaiqdi daeuj bangfwngz.”

Gou dauqfanj doiqdauq yamq ndeu lo.

“Gou……gou mbouj rox baenz- lawz bang mwngz.” Gou gig aeunaj couhdwg mbouj haengj gangj “mbouj gamj” .

“Gou youh mbouj heuh mwngz daeuj bang gou gaem ngwz.” Au- lungzgveiz miz di hozndat:“Cijaeu mwngz dawz gij gavaq raez neix hot hwnjdaeuj, rox lwi? Vaq caeuq saivaq cungj youq baihlaj daizcaeq.”

Yenzlaiz dwg heuh gou bang guh gijneix ndwi. Gou gvax gvaq dieg- hoengq naj moh, yupyup yatyat byaij daengz baihnaj daizcaeq, gip hwnj gij saivaq de caeuq geu vaq raez ndaem, gig geizheih cam:

“Aeu gou dawz vaq maranz bae?”

“Bamz.” De hat:“Aeu saivaq cug song diuz dinvaq hwnjdaeuj, gou yaek cang duzngwz.”

“A!”

Gou sawqmwh roxsingj, doq ciuq guh, song cik fwngz lij loq saenz, lwgda seiz mbouj seiz muengh coh duz ngwz hung deng Aulungzgveiz vangh haenx.

“Dawz rengz gwn cij okdaeuj cug maenh bae! Mbouj ndaej gangjriu!”

“Rox!”

Gou haenqrengz bae cug maenh dinvaq, hot aen hazdaeg, lij haeb heuj rag ndaet aen duq, saivaq de hamzbyumxbyumx. “Beih!” Gou biq gaemz myaiz he okdaeuj.

Seizneix, Ah Gunh、Ah Veij、Ah Giuh caeuq Ah Cang cungj humx gvaqdaeuj lo, cacoemj yaek bang- fwngz, gou baez myaeg gyoengqde, hemq:

“Byaij deuz! Dangj fwngz gaz din.”

(caengz sat)