Gou dwg vunz Namzningz,

Mingzcoh Cai Beizgangh;

Baezgonq youq ndawranz,

Gangj Begvah gvaq ngoenz.

Dwg Bouxgun lono,

Rox gangj Cuengh eu fwen;

Docih gyoengq beixnuengx,

Ciensim son gou rox.

64 bi gvaqbae,

Geiq Vahcuengh mbouj lumz;

Eu fwen maqhuz lumj,

Cungj vuenheij gvaq ngoenz.

Senj daeuj Niujyoz youq,

Youh miz 30 bi;

Seiqseiz rox vijsij,

Siengj Gvangjsih ranzmbanj.

Siengjniemh youz hawfwen,

Caeuq beixnuengx gangjgoj;

Bouxlawz caeuq gou rox,

Cojgvaq ngeix doenghbaez.

Nanz lai youq Niujyoz,

Ciengz loq ma Mbanjcuengh;

Caeuq ndiepgyaez beixnuengx,

Doiq fwen youh gangjgoj.

Ndaw moengh angq lumj rumz,

Ndiu le nyap baenz nyangj;

Simcieg caen hoj gangj,

Gyangznaek raemxda rih.

Caeuq yah gou naengh youq,

Simdaeuz lumj va langh;

Yawj Vahcuengh Cunhvanj,

Daj ranzmbanj cienz daeuj.

Bi 2020,

Sim cingqcaen angqyangz;

Yawj Vahcuengh Cunhvanj,

Danq Dahyingh lauxyoux.

Gyaeugigi cangndang,

Bak gangj riunyumnyum;

Veiz Suhyingh beixnuengx,

Lumj duzfungh hamz va.

De dwg sanhgohvangz,

Dangciengz couh eu fwen;

Sing rwenz doh seiqfueng,

Hawj vunz dingq dwgmaez.

Yawj Vahcuengh Cunhvanj,

Danq cezmuz gig ndei;

Gou cingqcaen vuenheij,

Geiq ciengxlwenx mbouj lumz.

Mbouj lumz caez mbouj lumz,

Vat gumz ndaem go’nganx;

Nyienh Vahcuengh Cunhvanj,

Bi dam bi engq ndei.

Niujyoz eu gij fwen,

Rwenz daengz guekcoj bae;

Vahcuengh Cunhvanj ndei,

Muengh yied bae yied gvangq.