Lij Senz dwg daih yozvwn’gyah seizgeiz Nanzbwzcauz, de cingdoeng vwnzyoz、lizsij、denhvwnz、lizfaz, sij gvaq haujlai saw. De lij guh lauxsae daiswj Bwzvei gvaq ne.

Lij Senz seiz iq ndawranz gig gungz, cibgeij bi couh rap hwnj diuz rapnaek ndawranz, de gag boux vunz dajndaem、dajsou, rap raemx、raemj fwnz. Couhcinj yienghneix youh nyaengq youh dwgrengz, hoeng cix mbouj lumz doegsaw. It bi seiq geiq ndawde, seizdoeng gij hong ndaw naz ceiq noix, Lij Senz couh cagaenj sam ndwen neix bae buekmingh doegsaw. Mbouj miz ngaenz gyau ngaenzhag, de couh bae bang lauxsae guhhong.

Baenz aen seizdoeng, de cungj haenqrengz doegsaw, moix ngoenz cungj doeg daengz gyanghwnz, mbouj caengz ndaej ninz donq gaeuq ndeu gvaq. Miz bi ndeu ndwenlab, gaenq daengz gyanghwnz lo, vunz ndaw mbanj cungj youq ndaw fangzhwnzloq, cij miz aen daeng ndaw rug Lij Senz lij rongh. Seizneix, mbwn doek roengz nae hung lumj bwnhanq nei, rumz haenq gienj gij naefaiq daj geh dou ndonj haeujdaeuj. Hoeng Lij Senz vanzlij mbouj caengz siengj yietnaiq, caenhguenj baiqdalaep baenz raq baenz raq guhcaeg daeuj, hoeng de vanzlij genhciz doegsaw.

Vih gyaep deuz baiqdalaep, hawj seiz ninz ndaej lai dinj saekdi, de couh daegdaengq loengh ndaw rug lai nit saekdi, feizloz gungraeuj yaek ndaep lo, couh mbouj caiq demgya fwnz lo. De caemhcaiq lij hai faj cueng iq, hawj rumznit gab siet hung guenq haeujdaeuj.

Lij Senz lij ndwn hwnjdaeuj, daez- sang gij sing, sing gok doegsaw, doq doeg vanzlij doq haenqrengz bibuengq aenndang. Doeklaeng, de song fwngz nit lai lo, song din hix nit ndaej mbouj roxnyinh saek yiengh lo, hoeng de vanzlij haeb heuj genhciz roengzbae, itcig doeg ndaej baeg lai le cij baiqdalaep yaep ndeu.

De singj gvaqdaeuj seiz, ndaw rug bienqbaenz aen seiqgyaiq saek ngaenz- hau, gwnz ciengz、 gwnz dou、gwnz congz, caemhcaiq gwnz byoem、 gwnz bwnda de, cungj venj rim mwi hau, gwnz namh hix giet hwnj caengz nae hau ndeu. Couh yienghneix, Lij Senz cungj- suenq baenz boux daih yozvwn’gyah ndeu lo.