Gyoengq manaez ndeu deng boux canghdwknyaen gyaep haeuj ndaw congh.

Boux canghdwknyaen youq bakcongh cang aen gabnyaen ndeu. Duz manaez lawz ok congh gonq dingh deng aen gabnyaen neix gab dawz，hoeng manaez wnq couh ndaej gouq lo.

Gyoengq manaez youq ndaw congh deng iek sam ngoenz sam hwnz le，couh doxcaez yaeng aen saeh byawz ok congh gonq neix.

Duz manaez geq naeuz：“Nienzgeij gou ceiq laux，gou ok congh gonq mbouj hableix ba.”

Duz manaez iq naeuz：“Gou ceiq iq，mbouj wngdang gou okbae gonq.”

Meh manaez naeuz：“Ranz gou lij miz sam lwg manaez caj gou ma ranz cij gyoengqde. Sou nyaenxsim hawj gyoengqde dai iek ha？”

Duz manaez gvez naeuz：“Gou gaenq deng sieng lo，wnggai ciuqgoq gou.”

Cij lw duz manaez maengh ndeu lo，de naeuz：“Gou nyienh okbae gonq. Mboujgvaq，danghnaeuz gou okbae doeklaeng，gou ndaej vih sou boizhaemz，bae haeb boux canghdwknyaen haenx dai bae.”

Gvaq geij ngoenz，boux canghdwknyaen daj ndaw congh rag gyoengq manaez dai iek ndeu okdaeuj lo.

(Bungz Vancouh/彭万洲 sij Lij Yunswngh/吕润生 hoiz)