Siujvaz dwg boux lwghag ceiq lauxgauj ndeu, song sam ngoenz couh deuz hag baez ndeu. Aen haggeiz gonq, Veiz lauxsae son yijvwnz ngamq daeuj dang bancujyin ban de, Veiz lauxsae hwnjdangz ngoenz daih’it couh raen Siujvaz mbouj daeuj hwnjdangz lo, cuengqhag le, Veiz lauxsae couh hai aen cimozdoz de bae ranz Siujvaz. Gvaq yaep ndeu , cijraen Veiz lauxsae boux dog gag gwih ci dauqma.

Boux son suyoz Yangz lauxsae raen le, cam naeuz: “Siujvaz vihmaz mbouj caeuq mwngz doxcaez ma ne?” “De mbouj youq ranz.” Veiz lauxsae naeuz, “Vunz ndaw ranz hix mbouj rox de bae gizlawz, daxboh de lij naeuz daeglwg de gyaez guh maz couh guh maz ba dem.”

Yangz lauxsae miz di hozndat: “Gijmaz daidu ya? Bohmeh cungj yienghneix lo, raeuz guh lauxsae lij nyapnyuk guh maz? Gyaez daeuj mbouj daeuj mbouj guenj de lo.”

Veiz lauxsae ngauzngauz gyaeuj, naeuz: “Raeuz guh lauxsae, mbouj caeuq gyahcangj geiq gijneix.” Ngoenz daihngeih, de youh gwih aen ci- mozdoz de bae ranz Siujvaz. Baenz- neix cijaeu Siujvaz mbouj daeuj hagdangz, Veiz lauxsae couh hwnj ranz de bae, fwnrumz mbouj dingz.

Couh youq Veiz lauxsae hwnj ranz Siujvaz geij baez le, Siujvaz couh caiq hix mbouj deuzhag lo.

Ngoenz ndeu, Yangz lauxsae gwih ci bae hagdangz, buenq roen bungz daengz Siujvaz, Siujvaz yousim swhgeij cizdau, cam Yangz lauxsae ndaej hawj de caez naengh ci bae hag lwi? Yangz lauxsae gamjdaengz gig geizgvaiq, cam de: “Mwngz soqlaiz cungj mbouj lau deuzhag, lij lau cizdau?” Siujvaz naj nding naeuz: “Neix dwg gaxgonq lo, seizneix gou caiq hix mbouj gamj cizdau roxnaeuz deuzhag lo, gou lau Veiz lauxsae youh bae ranz ra boh gou.”

Yangz lauxsae geizgvaiq cam: “Veiz lauxsae moix baez bae ranz mwngz cungj gangj gijmaz ne?” “Gijmaz hix mbouj gangj.” Siujvaz ngauzngauz gyaeuj, “De couhdwg youq henz yawj daxboh gou caeuq vunzlai dwkbej.”

Yangz lauxsae doeksaetyat: “Neix mwngz lau gijmaz ne?” Siujvaz mbwnjmbwnj bak han: “Mwngz mbouj rox, danghnaeuz Veiz lauxsae lauxlaux saedsaed naengh youq henz yawj couh suenq lo, hoeng de cungj gyaez son boux henz, cijaeu de baez son, daxboh gou couh saw cienz. Miz ngoenz ndeu, daxboh gou saw baenz cien lai maenz, dauq ranz couh hujdengdeng dwk ndaq gou naeuz, danghnaeuz baez- laeng gou lij deuzhag, de couh euj ga gou raek bae!”