Youq ranz gou，haglig ceiq sang couh dwg daxmeh lo—— De dwg yenzgiuswngh. Mboujgvaq, daxmeh cawj byaek saedcaih couhdwg suijbingz siujhagseng. De cawj “byaekhau cauj nohsei” “makyungz cauj gyaeqgaeq” doenghgij byaek neix lij maqhuz ndei gwn, hoeng baez cawj bya cawj noh daengj byaek guh fukcab di, de couh mbouj rox cawj lo.

Mboengqneix, daxmeh raen gou miz di byom, ndangdaej miz di nyieg, de couh siengj cawj yiengh he doiq de daeuj gangj miz di dwgrengz haenx—— cawx duz gaeq he ma cawj hawj gou boujbouj.

Daxmeh cawx duz gaeqdon caet gaen naek he ma, yaek yungh buenq he daeuj cawj dang, lingh buenq he ngoenz wnq hawj daxboh guh hoengzcauh. Ma daengz ranz, de yawj duzgaeq hunghaenghaeng haenx, mbouj rox baenzlawz roengzfwngz. Yienghneix, de dwk dienhvah hawj yahdaiq, cam yahdaiq baenzlawz cawj raemxdanggaeq. Yahdaiq daengq daxmeh, gyaeujgaeq caeuq soenjgaeq mbouj gwn, dungxsaej cawz seuq, daegbied dwg mbeigaeq mbouj ndaej hawj vaih, mboujnex nohgaeq couh haemz…… Daxmeh ciuq yahdaiq gangj bae guh, hoeng mwh ra mbeigaeq couh bungz daengz mazfanz lo, daxmeh youq ndaw saej daep daw ra bae ra dauq cungj ra mbouj raen mbeigaeq. Daxmeh gip lo, danghnaeuz mbeigaeq vaih lo, yienghneix duzgaeq neix couh gwn mbouj ndaej lo. Doeklaeng, ginggvaq lai baez cam, daxmeh duenqdingh mbeigaeq youq mwh gaj gaeq couh cawz bae lo. Ai, mbouj miz gingniemh couh baenz vahriu ha!

Duzgaeq swiq seuq lo, daxmeh couh siengj baenzlawz aeu duzgaeq faen baenz song faenh. Caxbyaek bingzseiz ronq byaek haenx dwg yungh mbouj ndaej lo, yungh geuz daeuj daet ba! Hoeng faggeuz yawj hwnjbae raehrwd neix daet mbouj ndaej ndokgaeq. Daxmeh cij ndei ra cax ndaw gvih daxboh bingzseiz yungh daeuj raemj ndok haenx okdaeuj. Fag cax neix youh hung youh naek, danghnaeuz mbouj siujsim dawz mbouj maenh…… siengjsiengj caen dwglau ha! Daxmeh doiqcinj laeng gaeq, laep song da raemj roengzbae, raemj mbouj deng, caiq raemj……

Nyaengq baenz buenq ngoenz, danggaeq cawj ndei lo. Mwh gwn haeuxcaeuz, gou gwn gaemz dang he, cam: “Meh, raemxdang baenzlawz baenzneix cit ha?” Daxboh riu naeuz:“Aeya, mwngz youh lumz cuengq……”

Mwngz naeuz, daxmeh “yenzgiuzswngh” gou, dwg mbouj dwg wnggai bae “daihhag dajcawj” ndeindei hag baenzlawz cawj byaek ne?

(seiq nienzgaep Dangh Ningz)