Daxboh naeuz, bouxboux cungj miz ranzmbanj, giz vunz doekfag caeuq majhung de, couh- dwg ranzmbanj. Hoeng daengz seizneix, gou lij mbouj rox gizlawz dwg ranzmbanj gou.

Ranzmbanj bohmeh couhdwg ranzmbanj gou lwi? Hoeng daxboh naeuz, gou doekfag youq Namz- ningz, ranzmbanj bohmeh liz Namzningz gyae’gyanggyang bae, gou cungj caengz ndaej raen gvaq ne.

Giz caengz ndaej raen gvaq de, guhlawz suenq dwg ranzmbanj swhgeij ne? Nyaenx Namzningz dwg ranzmbanj gou lwi? Hoeng daxmeh naeuz, gou youq Namz- ningz ngamq ndaej hopbi ndeu couh daeuj Byalaux Cibfanh gizneix lo, seizneix gou ndaej seiq bi gvaq, gou dwg youq gizneix majhung bw, mbouj dwg youq Namzningz majhung ne. Namzningz baenz yienghlawz, dwg mbouj dwg bya lai lumj gizneix, gwnz bya miz mbouj miz maknim baenz lai, gou saek yiengh cungj mbouj rox nauq.

Giz mbouj dwg swhgeij maj- hung de, giz baenz yienghlawz cungj mbouj rox de, guhlawz dwg ranzmbanj swhgeij ne. Nyaenx, gizneix suenq dwg ranzmbanj gou luba? ——Ai, gou guhlawz huk baenzneix ne, giz mbouj dwg swhgeij doekfag de, guhlawz ndaej suenq guh ranzmbanj swhgeij ne.

Nanzdauh, gou dwg mbouj miz ranzmbanj ma? Mbouj baenz bw! Bouxboux cungj miz ranzmbanj, hoeng ranzmbanj gou youq gizlawz ne?

Mboujguenj baenzlawz, gou cungj dwg vunz Cungguek. Mbouj- guenj dwg doekfag youq gizlawz, goj mboujguenj dwg majhung youq gizlawz, gou cungj dwg doekfag youq Cungguek, youq Cungguek majhung, gijneix guhlawz cungj mbouj loeng luba?

Nyaenx, ranzmbanj gou couh- dwg Cungguek, youq Cungguek raeuz, gizlawz cungj dwg ranzmbanj gou.

（Daj《Bonjsei Sim Lwgnyez》（Veiz Gizlinz raiz）senj okdaeuj, Lwgfwngzmeh(Luz Fwncangj)/卢奋长 hoiz）