Gou miz daxboh unqswnh ndeu, de miz simgyaez、fouzsei、sim- ndei……Doenghgij neix gou cungj maij, mboengq angqyangz gou caeuq daxboh caemhyouq haenx engqgya hawj gou nanzlumz.

Seiz iq, gou dam ninz dangq- maz, yungzheih ninznaek dangqmaz. Seizde, daxboh cungj yaengyaeng umj gou hwnjdaeuj, got coq ndaw rungj, ngaeuz gou couh caeuq daxboh doxdaeb youq giz ndeu lo.

Hwnj youwzyenz le, daxboh gyaez caeuq gou guhdoih guh“cazgi dungcoz”. Beijlumj, gou gwih youq gwnz mbaq daxboh, song fwngz got gyaeuj de maenhnwngnwng bae, seizneix, ngaeuz daxboh couh“maj”sang mboengq ndeu; gou iet song gen, aenngaeuz daxboh couh miz song gaiq gaeu iq.

Geiq ndaej bi’gvaq seizhah, dienheiq oemndat lai, gou hemq yaek gwn naesa. Daxboh dingj nditndat daiq gou bae cawx. Gyoengqvunz baizdoih cawx naesa haenx miz geijcib mij raez, gou ndwn youq giz rieng, haidaeuz vanzlij cingsaenz dangqmaz, deng ndit dak haenq lai le, gou couh naiqnueknuek ngaem gyaeuj dingh youq lo.

Gou yiengh hojlienz lai, beng riengbuh daxboh, de miz di hozndat yawj gou, danhseih rag gou haeuj laj ngaeuz de bae. Gou boux iqet neix ndwn youq laj aenngaeuz hungsang haenx ngamjhab ndaej dangj ndit. Miz ngaeuz daxboh dangj ndit, gou couh gag guhcaemz, lumz daxboh vanzlij youq laj daengngoenz deng ndit dak ndatfwdfwd.

Daxboh deng ndit dak ok hanh le buh mbaeq liux. Gij feihdauh naesa, gou geiq mbouj ndaej lo, cij geiq ndaej daxboh yaengyaeng doihai gij naesa gou soengq daengz henz bak de haenx, riu naeuz：“Daxboh mbouj ndat.”Daengngoenz doek baihsae, aenngaeuz daxboh deng rag ndaej raezrangrang bae……

Gou rox, haengjdingh miz ngoenz ndeu, aenngaeuz daxboh mbouj caiq daengj soh, danhseih ngaeuz dou haengjdingh ciengxlwenx doxing caemhyouq, yiengjsouh gij saedceij vuenyungz aenngaeuz“dox- daeb”!

（Maj Cisiengz）