Lwgyiengzbya caeuq lwgdouq doxceng. Lwgyiengzbya fatheiq, de siengj hwk lwgdouq, ok gaemz heiq neix.

Banhaemh, lwgdouq cingq youq ndaw ranz yawj saw. Sawqmwh rog cueng cienz daeuj sing rongx ndeu: “Lwgdouq dingq ndei, gou couhdwg nyaenma, gou ngoenzneix yaek gwn mwngz.”

Lwgdouq baez doeksaet, ngiengx gyaeuj yawjraen bakcueng benz hwnj duz nyaenma ndeu, lau yaek dai bae. Hoeng dang de yawjraen gaiqga nyaenma gwnz daizcueng seiz, youh riu lo, de naeuz: “Gaej hwk vunz lo, mwngz gwn mbouj ndaej gou. Lij dwg deuz ba. Gaej youq gizneix nauh lo.”

Rog cueng mbouj miz singyaem lo, lwgdouq liuh daengz “nyaenma” byaij deuz lo.

Ngoenz daihngeih banhaemh, lwgdouq cingq youq ndaw ranz sij cozyez, bakcueng youh cienz daeuj sing rongx ndeu: “Lwgdouq dingq ndei, gou dwg manaez, gou ngoenzneix yaek gwn mwngz.”

Lwgdouq youh baez doeksaet, ngiengx gyaeuj yawjraen bakcueng benz hwnj duz manaez ndeu, lau yaek dai bae, hoeng dang de yawjraen gaiqga manaez gwnz daizcueng seiz, youh riu lo, de naeuz: “Gaej yaeuh vunz lo, mwngz gwn mbouj ndaej gou, lij dwg byaij deuz ba! Gaej youq gizneix nauh lo.”

Ngoenz daihsam banhaemh, lwgdouq cingq youq ndaw ranz swiq lauxbaeg, rog cueng cienz daeuj sing rongx ndeu: “Lwgdouq dingq ndei, gou dwg duzguk daihvuengz, gou ngoenz- neix yaek gwn mwngz.”

Lwgdouq baez doeksaet, ngiengx gyaeuj yawjraen duz guk ndeu benz youq bakcueng, hwk ndaej ndang saenzdedded. Hoeng dang de yawjraen ga duzguk gwnz daizcueng seiz, haha riu hwnjdaeuj. De mbouj naihfanz naeuz: “Gaej nauh lo, mwngz mbouj dwg duzguk daihvuengz, gwn mbouj ndaej gou. Guk daihvuengz caeuq nyaenma、manaez ityiengh, ga cungj dwg miz nyauj. Mwngz swhgeij yawjyawj, benz youq gwnz daizcueng dwg song aen daez. Sojmiz doenghduz ga maj ve cungj dwg gwn nywj, caeuq duzdouq dwg baengzyoux, itdingh mbouj gwn gou. Cang nyaenma, cang manaez, cang duzguk daihvuengz hwk mbouj ndaej gou. Mwngz dwg lwgyiengzbya, raeuz doxndei ba!”

Lwgyiengzbya baez dingq, rox deng lwgdouq nyinh okdaeuj lo, de roxnyinh swhgeij mbouj doiq. Ngoenz- laeng youh bae ra lwgdouq guhcaemz, song boux baengzyoux youh doxndei lo.

（Mungz Ningz hoiz）