“Hai ya! Danghnaeuz mbouj dwg gou bae yinx de gyaep gvaqdaeuj, baenzlawz ndaej rox gij rongz de couh youq baihlaj neix?” Ah Gunh nyaeuq giuzndaeng, ndiengq bak, caeuq Ah Veij doxceng.

“Suenq lo suenq lo, sou couh rox baenzneix gangj.” Gou naeuz,“Raen duzngwz couh buet lumj duznyaenma deng faexmbaenq moeb baez he nei, seizneix lij miz naj youq dangqnaj Aulungzgveiz gangjboq dem? Dangh- naeuz mbouj dwg gou——”

“Hi!”

Aulungzgveiz cienq gyaeuj dauqlaeng, aeu lwgfwngzyinx daengj youq gwnz naengbak “hi” sing he, dajduenh gij vah gou bae, hix hawj dou daengx roengzdaeuj lo, dou ndwn youq dieghoengq naj moh, byaengq hung lwgda yawj Aulungzgveiz yaek guh maz.

De menhmenh byaij daengz baihnaj daizcaeq, buenq gungj hwet, veq geij go nywj, cim gij geh baihlaj daizcaeq. Ndang de ngeng youq henz, gig dwgrengz. De baenzneix hawj dou roxnyinh gaenjcieng hwnjdaeuj lo, cungj doiqdauq song yamq, mbouj gamj oksing cij yawj ndwi.

Gou cangguh mbeihung, gizsaed gig lau, siengj daengz haxbaenh nyouh yiemjyiemj yaek conh okdaeuj, lumj miz raq rumz ndwenlab daj baihlaeng bongj gvaqdaeuj nei. Din’gvaz gou yo youq baihlaeng, dinswix daemh youq baihnaj, baenzneix ceiq bienh buet- deuz lo, saeklaeuq duz ngwz hung haenx youh bongh okdaeuj, gou cijaeu baez cienj giujdin, couh ndaej buet- deuz, baezneix gou couh mbouj rox lumj haxbaenh yienghhaenx gag boux vunz ndeu deng ce roengzdaeuj lo, saeh huk cij ndaej guh baez he, baez moq couh yaek gwn vei hung lo.

Aulungzgveiz ngaemgyaeuj yawj coh rinbanj geij baez, de mbouj gamj momqyawj. Gou caen lau duz ngwz hung haenx yaek bongh ok congh daeuj, haeb ndaeng de gaemz ndeu. Hoeng maz cungj mbouj fatseng ne, dinghrikrik, cij miz gij sing Ah Giuh dingzdingz duenhduenh sup mug ndwi.

(caengz sat)