“Gou roxnyinh daxmeh lij ndaej gyaeu lai bi, neix mboujdan dwg gij roxnyinh ndawsim gou, lij daj gij yiengh daxmeh ciengzseiz yawj ndaej ok. Bi’gvaq 8 nyied, raeuz daiq bohmeh bae henz haij youz, daxboh daxmeh cungj lij ndaej naengh ruz ok rog haij bae youzlangh, gwnz haij rumz gaenj langh hung, daxboh daxmeh dauqma le, ndangdaej mbouj miz saekdi saeh. Caiq gangj gou ciengzseiz daek haeuxngaiz hawj daxmeh, roxnyinh gij gwn daxmeh lij lumj gaxgonq ha, baenzlawz naeuz aenvih maranz gvaq cieng, bungz daengz mbat binghraq neix youq ranzmbanj ndwen baj couh bingh naek lone?” Gou nai bouxgvan, hix dwg gangj vah ndawsim.

“Vah dwg yienghneix gangj, hoeng ndwenngoenz bouxlaux couh- dwg yienghneix, ngoenz caeuq ngoenz mbouj doxdoengz ha!” Bouxgvan lij dwg yousim sebseb, mbouj rox baenzlawz guh cij ndei. Lwnh bae lwnh dauq, doeklaeng lij dwg gietdingh ciuq gij iugouz guekgya daeuj guh, mbouj comz vunzlai gvaq ngoenzseng, gag vunz ranz bonjfaenh gvaq couh ndaej lo.

Daihgya sim haemq dingh le, gwn haeuxcaeuz gvaq le gou caeuq bouxgvan byaij roen lienh ndangdaej. Sawqmwh, bouxgvan ciep ndaej aen denva gyagoeng dwk daeuj, gyagoeng hujdengdeng naeuz:“Daxmeh mwngz ngoenzcog mbouj gvaq ngoenzseng lo, sou bae doiq aen dangauh bae!” Hix mbouj gangj vihmaz couh gag ndaep soujgih lo. Bouxgvan baez dingq gyagoeng baenzneix gangj, mbouj gyaeuj mbouj rieng gig geizheih, lauheiq miz maz saeh mbouj deng, sikhaek daj denva bae cam dahnuengx.

Laxlawz dwg aenvih nuengxgo youq diegrog mbouj ndaej ma, gyagoeng gyabuz huj le cij gangj vah gik haenx. Rox gij laizyouz le, gou dauq daj denva hawj gyagoeng, gejnaeuz:“Daxboh, bineix hingzseiq caeuq doenghbaez mbouj doxdoengz, nuengxgo lauheiq naengh banci mbouj ancienz geijlai, wngdang lijgaij de cij deng.” Hoeng gangj bae gangj dauq, gyagoeng couhdwg ngeix mbouj doeng, lij doiq gou naeuz:“Daxmeh gvaq ngoenzseng lwgmbwk cungj mbouj ma, gvaq ngoenzseng miz maz angqyangz caeuq heiqangq! Mboujguenj ngoenz- cog sou guh maz doxgaiq ndeigwn, gou cungj mbouj maranz gwn haeux- caeuz!” Aiya, gou roxnyinh mbangj seiz bouxlaux hix lumj lwgnyez nei, baez fatheiq le mwngz gangj maz de cungj dingq mbouj haeuj rwz.

Ngoenzseng gyabuz daengz lo, hoeng daengx ranz vunz sim mbouj dingh, mbouj rox dang guh mbouj dang guh. “Dang guh couh guh! Gou mbouj saenq daxboh daxmeh caen baenzneix mbouj roxsoq!” Bouxgvan soqlaiz guh saeh mbouj haengj yupyup yawjyawj, yaek guh maz gangj guh couh guh.

Yienghneix daegnuengx bae cawx byaek, nuengxsimj nyaengq guh ceizbyaek, gou bae aeu dangauh ma, daeglan dahlan hix daiq lwg iq ma lo, bouxlaux dajgangj, lwgnyez guh’angq, ndawranz sawqmwh yiengjfoedfoed, nauhyied dangqmaz. Gou yawjraen gyabuz yaep ndeu daeuq dah lanlaenj, yaep ndeu umj daeg lanlaenj guhmaij, gyagoeng naengh youq bangxhenz riunyumnyum yawj dwk, aiq gaenq lumz gij vah haemhlwenz de gangj gvaq lo. Seiz engq angqyangz dwg, daengx ranz bouxlaux lwgnyez gvaengz youq aen daiz cuengq dangauh haenx, sing hung ciengq “go ngoenz- seng”, yienznaeuz singdiuh sang daemq mbouj doxdoengz, hoeng bouxboux ndawsim angqyangz dox- doengz, gyabuz hix naj hai naj riu dwk boq lab mbaenj ndei, doeklaeng caezgya gwn dangauh ndaw bak ndawsim cungj diemzsubsub.

3 nyied 18 hauh, gienh saeh engq angqyangz cienz daeuj: Yihyen bauq hawj genjcaz cingzgvangq daeuj, gyabuz mbouj miz maz bingh naek! A, ndaek rin naek daenz youq ndawsim daengx ranz vunz dauqdaej ndaej doek roengz lo, caezgya geijlai sim’angq ha! Bimoq dou couh ndaej comz haemq lai vunz daeuj hoh gyabuz gvaq ngoezseng la.

Dingjlingz daengz ngoenzneix, daengx guek mbouj miz engqlai vunz deng gij bingh sihgvanh feiyenz lo, gak dieg canghyw bae bang Huzbwz, hix ndaej maranz lo! Gou roxnyinh bineix seizcin miz di mbouj doxdoengz, hoeng de lij dwg byaij ndiengndieng lizbae lo, seizhah daeuj daengz lo.

(sat)