Sing heuh neix, gig doxndiep、caenmaed、haeujsim, gou cienq gyaeuj dauq laeng bae, Ah Gunh、Ah Veij、Ah Giuh caeuq Ah Cang lumj 4 duz ma iq riengz youq baihlaeng duz ma- ngauz hung ndeu nei, coh mohrin baihneix buet daeuj.

Daihroek Gaeb Duzngwz

“Aulungzgveiz.”

Gou daih hemq coenz he, conghhoz hohanghang miz di in, Aulungzgveiz ndang cangq lumj duz ma’ngauz nei—— Mbouj, lumj goengq dap iq, lingx 4 laeq lwgnyez buet daengz henz ndang gou, gou lumj daj ndaw loqdwglau ndiu gvaqdaeuj, fwngz ndeu lumj lumh ndaej benj henz congz ninz sim’onj roengzdaeuj lo, ndaw gvaengzda dumzsoebsoeb, yaek daej lo.

“Ah Byauh, duz ngwz hung ne?”

“Ah Byauh, mwngz yawjraen duz ngwz hung bae gyawz bae lo?”

“Ah Byauh……”

“Ah Byauh, mwngz baenzlawz mbouj buet ne?”

Gyoengqde yawj mbouj raen duz ngwz hung, couh gwq daeuj cam gou, lumjnaeuz duz ngwz hung haenx dwg maz dijbauj, gaenq deng gou gag yo hwnjdaeuj nei, gou hamz gij raemxda youq ndaw gvaengzda, gig daekeiq fwngfwng. Gou cengj hwet, naengh ndaej sohrwdrwd youq gwnz saeceij- rin, fukdauq le gij yiengh haxbaenh gwih max cijveih “sam bouxak hoenx Lij Bu”, mbwnj coh gyoengqde, yawj- siuj naeuz:

“Hw! Lumj sou nei mbeiiq, buet maz? Gou couh aeu youq gizneix yawj duz ngwz hung bae gyawz!”

Ah Gunh caeuq Ah Veij mbouj saenq gou, Ah Giuh baez sup mub, “hu” sing ndeu, lumjbaenz naeuz:“Mbo!” Ah Cang song da daengx dwk, aj bak hung raeuh, lumj ndaw bak miz aen lwgmbi hung nei.

“W, gizsaed duz ngwz hung mbouj seizbienh haeb vunz, cijaeu mwngz youq dwk mbouj gik de mbouj ning de—— De buet gyawz bae lo? Gou ra de haujlai nanz lo.” Au- lungzgveiz cam.

“Ndonj haeuj ndaw mohrin bae lo.” Gou daekeiq dwk vix giz geh baihlaj daizcaeq baihnaj moh, doengzseiz menhmenh ning gij ga- hengh lij loq saenz, nyaenx nanq daj gwnz saeceijrin bin roengzdaeuj.

“Ai! Bi’gvaq gou couh fatyienh henzgyawj miz duz ngwz hung he lo.” Aulungzgveiz doq nu song fajfwngz youh hung youh co, fat ok sing goksasa, doq yamq hung byaij coh moh, ndaw bak nam naeuz:“Yenzlaiz de ndoj youq gizneix, caen dwg daenj vaih haizcauj ra mbouj raen, doeklaeng cimh ndaej mbouj sai rengz!”

“Gou dwg boux daih’it fatyienh de.” Ah Veij naeuz,“Danghnaeuz mbouj dwg gou buet daengz baihde bae ra ngafaex, baenzlawz ndaej fatyienh de ne?”

Gou rag song ga mwnh, gaen youq baihlaeng gyoengqde, byaij coh daizcaeq baihnaj moh, miz Au- lungzgveiz, dou cungj mbouj lau lo, haxbaenh deng hwk ndaej hoenz saenz hix gaenq vut gvaq laeng gyaeuj bae, geij congh bak iq cijcij cetcet euq hwnjdaeuj lo.

(caengz sat)